Անզուսպ ինքնափիառի հեռակա մրցում՝ ՔՊ-ականների միջև

Հայաստանում եռում է ներքաղաքական կյանքը, Արցախի շուրջ տեղի են ունենում մտահոգիչ զարգացումներ, տնտեսությունը գահավիժում է, ապագան էլ չի երևում: Սակայն, արի ու տես, որ ՔՊ-ականներին այս իրավիճակը առանձնապես չի մտահոգում, նրանցից ոմանք զբաղված են սեփական ինքնափիառով՝ մոռանալով աշխարհում ամեն բան:

Դիցուք՝ պատգամավոր Արսեն Թորոսյանը գրեթե յուրաքանչյուր շաբաթ այցելում է այս կամ այն մարզ, մասնակցում ԲԿ-ի բացմանը կամ վերանորոգման աշխատանքներին է հետևում` չմոռանալով հավելել, որ ինչ դրական բան արվել է՝ արվել է իր կառավարման տարիներին: Ընդհանրապես տպավորություն է, որ Արսեն Թորոսյանը դեռևս դուրս չի եկել նախարարի դերից:

Պատգամավոր Արեն Մկրտչյանը դուրս չի գալիս Ալավերդիից, հենց նա է համարվում Ալավերդիում սպասվող ՏԻՄ ընտրություններում ՔՊ քաղաքապետի թեկնածուն և արդեն իսկ սկսել է  ակտիվ քարոզարշավը; Հետաքրքիր է՝ նախորդ երեք տարիների ընթացքում նույն ՞  ջերմեռանդությամբ էր Մկրտչյանը հետաքրքրվում Ալավերդու խնդիրներով, թե սերն առ այս քաղաք ծագել է հենց ՏԻՄ ընտրությունների նախաշեմին:

Երևանի քաղաքապետի ՔՊ թեկնածու Տիգրան Ավինյանը անձնվիրաբար անցել է քարոզարշավի սուրբ գործին: Նա գրեթե յուրաքանչյուր օր հանդիպում է այս կամ այն վարչական շրջանների ղեկավարների հետ և իրեն զգում ասես ընտրությունները արդեն անցել են, ինքն էլ Երևանի նորընտիր քաղաքապետն է:

Երևանի գործող քաղաքապետ Հրաչյա Սարգսյանը, ով վերջերս ակտիվորեն լծվել էր իր ֆեյսբուքյան էջի հետևորդներ հավաքելով և չէր զլացել նույնիսկ գովազդ միացնել դրա համար, այսօր այդ նույն էջում ակտիվորեն կիսվում է այն ծրագրերով, որոնք պետք է կատարվեն Երևանում: Դա, կրկնենք, անում է սեփական էջով, ոչ թե օրինակ՝ քաղաքապետարանի:

Ինչպես ասում են՝ աշխարհն աշխարհով, ՔՊ-ականներն՝ իրենց ինքնափիառով....