Աննախադեպ հակառեկորդներ Փաշինյանի ղեկավարած Նոր Հայաստանում

Վերլուծական 27 Ապրիլ, 2022 20:57

Աննախադեպ հակառեկորդներ Փաշինյանի ղեկավարած Նոր Հայաստանում

Իշխանափոխությունից հետո Նիկոլ Փաշինյանն ու թիմը պարբերաբար ներկայացնում էին այն աննախադեպ երևույթները, ձեռքբերումները, որոնք առաջին անգամ Հայաստանում արձանագրվում էին հենց իրենց` իշխանության գալուց հետո։ Դիցուք` ՃՈ տեսուչի կողմից տուգանվում էր վարչապետի կինը, ներդրումներ էին հորդում այնպիսի ծավալների, որ երբեք ՀՀ տնտեսությունը չէր տեսել։

Սակայն, հեղափոխությունից չորս տարի անց ունենք մի պատկեր, երբ այս իշխանությունների աննախադեպ հակառեկորդները հասել են նույնչափ աննախադեպ ծավալների։ Ահա թե ինչ, մեղմ ասած, բացասական դրվագներ են առաջին անգամ արձանագրվել Նոր Հայաստանում։

Առաջին անգամ նորանկախ Հայաստանի պատմության մեջ երկրի ղեկավարի կողմից ստորագրվել է կապիտուլյացիոն ակտ, որով թշնամուն առանց մեկ կրակոցի զիջվել է Արցախի տարածքի զգալի մասը։ Անշուշտ, Փաշինյանը արդարացում գտել է նաև այս դեպքում` մեղավոր էր բանակը, նախկինները, միջազգային հանրությունը։ Պատերազմը կանգնեցվել է որպեսզի փրկվեն 30, ապա, չգիտես ինչպես, 20 հազար դարձած կյանքեր։

Առաջին անգամ ՀՀ նորանկախ պատմության մեջ վարչապետի շարասյունը վրաերթի է ենթարկել քաղաքացու, ով այնուհետև, ցավոք, մահացել է։ 2018-ին Նիկոլ Փաշինյանը հուժկու պայքար էր սկսել պադավատապետության դեմ և այն նույն խաչմերուկում, որտեղ երեկ տեղի է ունեցել պատահարը, հեծանիվ էր քշում։ Երեկվա դեպքից հետո անգամ ներողություն չհնչեց վարչապետի աշխակատակազմից, շատ արագ գտան միակ մեղավորին և պատասխանատուին` վարորդին և բոլոր սլաքները ուղղեցին հենց նրա կողմ։

Առաջին անգամ Հայաատանում պետական կառավարման համակարգում բաժանվել է 209 միլիոն դոլարի պարգևավճար։ Սա բացատրվել է նրանով, որ այսպիսի կրեատիվ ձևով պայքարում են կոռուպցիայի դեմ։ Պարզապես կոռուպցիան, չգիտես ինչու, ոչ մի տեղ այդպես էլ չանհետացավ:

Առաջին անգամ ՀՀ ԱԺ-ում տեղի ունեցավ մասսայական ծեծկռտուք, որի բոլոր մասնակիցները արդյունքում արդարացվեցին և որևէ մեկի մասով անգամ էթիկայի հանձնաժողով չձևավորվեց։

Առաջին անգամ ՀՀ ԱԺ բակում իշխանական պատգամավորը` Սիսակ Գաբրիելյանը ծեծի ենթարկեց ցուցարար քաղաքացուն։ Թերևս ավելորդ է նշել, որ այս դրվագով տուժող է ճանաչվել հենց պատգամավորը։

Առաջին անգամ Հայաստանում պատգամավորին թույլ չեն տվել այցելել կալանավորված քաղաքացիներին: Մասնավորապես` երեկ գիշերը Հայաստան խմբակցության պատգամավորներին արգելվել է ներս մտնել Արաբկիրի ոստիկանական բաժանմունք և տեսակցել ձերբակալված երեք երիտասարդներին:

Առաջին անգամ նորանկախ Հայաստանի պատմության մեջ Հայաստանի ավիացիայի ներկայացուցիչ ավիաընկերությունները հայտնվեցին ԵՄ սև ցուցակում, պատճառն էլ պարզ է՝ Քաղավիացիայի կոմիտեի ղեկավար Տաթևիկ Ռևազյանը նշանակվելուց ի վեր ոչինչ չի արել ոլորտում առկա խնդիրները լուծելու համար: Փաշինյանը, սակայն, պաշտպանեց Ռևազյանին և հայտարարեց, որ ստեղծված իրավիճակը նախկինների սաբոտաժի արդյունք է:

Առաջին անգամ Հայաստանի տարբեր տարիքի ֆուտբոլի հավաքականները հակառակորդին պարտվեին 10 և ավել գնդակի տարբերությամբ: Եվ սա այն դեպքում, երբ հանրությանը խոստանում էին՝ 2050-ին դառնալ Եվրոպայի կամ աշխարհի մեդալակիր:

Առաջին անգամ վարչապետի գաղտնի հրամանագրով բարձրացվեց կառավարության աշխատակազմի ղեկավարի և երկու փոխվարչապետերի աշխատավարձը՝ դարձնելով 1,5 մլն դրամ:

Առաջին անգամ ԱԺ գնումների մոտ 40 տոկոսն իրականացվել է մեկ աղբյուրից՝ առանց մրցույթի, ինչը կոռուպցիոն ռիսկ է պարունակում:

Առաջին անգամ վարչապետի տիկնոջ վարսահարդարը ու ոճաբանը կառավարությունում ընդունվել են աշխատանքի և սահմանադրական որևէ կարգավիճակ չունեցող Աննա Հակոբյանին սպասարկելու համար բյուջեի միջոցներից աշխատավարձի, պարգևավճարների ու գործուղման օրապահիկների տեսքով ստացել են շուրջ 19 մլն դրամ՝ վերջինիս ուղեկցելով նաև արտերկրյա այցերի ժամանակ։

«Հայաստան» համահայկական հիմնադրամին վերջին 15 տարիների ընթացքում ամենաքիչ նվիրատվությունն է արվել:

Առաջին անգամ իշխանության կողմնակիցները հարձակում գործեցին ընդդիմադիր մամուլի ակումբի վրա:

Առաջին անգամ ըստ պաշտոնական վիճակագրության՝ Հայաստանից մեկ տարում հեռացել է շուրջ 300 հազար մարդ, ոմանք աշխատանքի են մեկնել ՌԴ, ոմանք էլ պարզապես անվերադարձ հեռացել են հայրենիքից:

Ահա այսպիսին է Նիկոլ Փաշինյանի աննախադեպ ձեռքբերումների հակառակ կողմը....