Կանանց իրավունքների «թունդ» պաշտպաններ Լենա Նազարյանն ու Մարիա Կարապետյանն ընդհատակ են անցել

Հայաստանում տեղի ունեցող վերջին իրադարձությունների ֆոնին առավել է սրվում կանանց իրավունքների պաշտպանության հարցը: Օրը ցերեկով ոստիկանները անհամաչափ ուժ կիրառելով կանանց են փռում ասֆալտին կամ բերման ենթարկում՝ հասցնելով մարմնական վնասվածքներ: Օրը ցերեկով հարձակվում են զոհված հերոսների մայրերի վրա: Վարչապետի շարասյան կողմից վրաերթի է ենթարկվում հղի կին: Իսկ ու՞ր են այդ նույն պահին տարիներ առաջ միջազգային կազմակերպությունների, դեսպանատների դարպասները ջարդող ակտիվիստ կանայք:

Ի դեպ, ՔՊ-ականների մեջ նման նախկին ակտիվիստների պակաս չի զգացվում: Հիշեցնենք, որ օրինակ` Լենա Նազարյանը և Մարիա Կարապետյանը ժամանակին շատ էին կարևորում կանանց իրավունքների պաշտպանության հարցը:

Նրանք հայտարարում էին, որ պետք է քաջություն ունենալ և առերեսվել կանանց դեմ բռնության դեպքերին: Իսկ ինչո՞վ են այժմ զբաղված պատգամավորական մանդատի հասած Նազարյանն ու Կարապետյանը` իհարկե, լռելով. լռելով, որովհետև այլևս անհրաժեշտ է պահել սեփական իշխանությունը և ամեն գնով արդարացնել կանանց հանդեպ բռնությունները, որոնց ականատես ենք լինում վերջին օրերին: Ի՞նչ է սա, եթե ոչ երկակի ստանդարտներ և աչքակապության դասական դրսևորում ՔՊ-ական պաշտոնյա կանանց կողմից...