Վահան Քերոբյանը գովազդվում է՝ առաջ մղելով յուրային գործարարի բիզնեսը

Էկոնոմիկայի նախարար Վահան Քերոբյանը հերթական անգամ իր ֆեսյբուքյան էջում հանրությանը ավետել է յուր հայրենանվեր գործունեության արգասիքների մասին:

«Անցած տարի Գավառում ԱԺ նախընտրական քարոզարշավի ժամանակ Հրայրս հարցրեց, թե ի՞նչ անի իրեն պատկանող արտադրական տարածքում։ Ասեցի, որ լավ հնարավորություններ կան թեթև արդյունաբերությունում ու մի քիչ գովազդ արեցի։ Գովազդն աշխատեց» - գրել է նախարարը և կցել նամակագրության սքրինշոթը:

Առաջին հայացքից թվում է, թե վերը նշված Հրայր Գուլաբյանը ընդամենը շարքային քաղաքացի է, ում նախարարը մի փոքր գովազդ է արել՝ առաջ է բրդել նրա բիզնեսը և ահա, ունենք նոր բիզնեսի հաջողված օրինակ: Բայց արի ու տես, որ երբ համացանցում իրար կողք ենք դնում քաղաքացու անուն ազգանունը և Գավառ համայնքի անվանումը, պարզ է դառնում, որ Գուլաբյանը Գավառ համայնքի ավագանու անդամ է:

Վերջինս նաև «Գավառ Տրանս» ՍՊԸ-ի սեփականատերերից մեկն է:

Այս ընկերությանը տարիներ առաջ անդրադարձել էր ՏՄՊՊՀ-ն` նշելով, որ «Գավառտրանսը» ունի գերիշխող դիրք, քանի որ այն հանդիսանում է Գավառը և հարակից գյուղերը սպասարկող միակ երթուղին:  Իր վարքագծով նա խոչընդոտել է առավել բարեխիղճ ընկերությունների մուտքը նշված շուկա, քանի որ մրցութային փաթեթում առաջարկել է անհամեմատ ցածր գին, ինչն էլ մրցույթը շահելու հիմնական պատճառներից մեկն է հանդիսացել: 

Ակնհայտ է նաև, որ Գուլաբյանը բացահայտ պրո-իշխանական դիրքորոշում ունի, նա իր ֆեյսբուքյան էջում կիսվել է վարչապետ Փաշինյանի հայտնի երկտողով:

Հարց է առաջանում՝ իսկ նման հաջողակ գործարարի ինչի՞ն է պետք Վահան Քերոբյանի գովազդը՝ նոր բիզնես դնելու համար: Եթե Քերոբյանը աջակցեր դիցուք՝ իրենց քաղաքական թիմին որևէ կերպ չօժանդակած, պետական պաշտոն չզբաղեցնող մեկի, ապա կարող էինք միայն ծափահարել: Սակայն այժմ գործ ունենք մի իրավիճակի հետ, երբ արդեն բացահայտ աջակցում են յուրայիններին և դեռ մի բան էլ դա ներկայացնում են իբրև աջակցություն բիզնեսին....