Սյունիքի նախկին և ներկա մարզպետների միջև հեռակա «պատերազմ» է սկսվել

Սյունիքում ՔՊ-ականների միջև թեժ պայքարը չի դադարում: Հիմա էլ, ինչպես երևում է, հարթ չեն ընթանում նորանշանակ մարզպետ կալավանցի Ռոբերտ Ղուկասյանի և նախկին մարզպետ Մելիքսեթ Պողոսյանի յուրայինների հարաբերությունները: 

Մասնավորապես` արշալույսները խաղաղ չեն Սյունիքի մարզի Տեղ համայնքում․ նախօրեին կրկին քաշքշուկ է տեղի ունեցել համայնքապետի, նրա կողմնակիցների եւ ավագանու ընդդիմադիր անդամ Մասիս Զեյնալյանի միջեւ։ Վերջինս պարբերաբար անդրադառնում է համայնքապետ Դավիթ Ղուլունցի բացթողումներին։ Ղուլունցը, հիշեցնենք, Սյունիքի նախկին մարզպետ Մելիքսեթ Պողոսյանի քրոջ որդին է։ Միջադեպի պատճառը եղել է այն, որ Զեյնալյանը հանդիպել է նորանշանակ մարզպետ կալավանցի Ռոբերտին եւ ներկայացրել համայնքում տիրող իրավիճակը։ «Մարզպետին ասել եմ, որ թող թոշակառուներից ազատվի, ջահելներին նշանակի, մենք էլ ենք ուզում աշխատենք։ Համայնքային պաշտոններում Ղուլունցը իր քեռուն, մորը եւ այլ ծանոթ-բարեկամների է նշանակել»,- պատմել է  Զեյնալյանը:

Այնուհետև մամուլում տարածվում է մի տեղեկություն, որ Ղոլունցը, բանակում չծառայելով, կոնտուզիայի թոշակ է ստանում, ինչը, ըստ էության, հաղորդում է հանցագործության մասին: Հարց է առաջանում՝ ո՞ւմ է պետք թուլացնել նախկին մարզպետ Մելիքսեթ Պողոսյանի դիրքերը մարզում` հարվածելով վերջինիս յուրայիններին, ովքեր դեռ պահպանում են իրենց պաշտոնները: Այն տեղեկատվական «սլիվից» հետո, որ Ղուլունցը համայնքապետարանում ԽԾԲ տեղավորելով է զբաղված՝ Ղուկասյանը այժմ ունի լեգալ և լեգիտիմ իրավունք դնելու վերջինիս պաշտոնավարումը դադարեցնելու հարցը՝ ավագանու միջոցով անվստահություն հայտնելով նրան: Ռոբերտ Ղուկասյանը, բնականաբար, ցանկանում է ամրապնդել իր դիրքերը, սակայն առկա են խանգարող հանգամանքներ` ի դեմս նախկին մարզպետի յուրայինների, ովքեր զբաղեցնում են համայնքապետերի պաշտոններ և չեն ցանկանում անցնել Ղուկասյանի թրի տակով: Սրդյունքում` Սյունիքում ՔՊ-ականների միջև հանուն աթոռի և իշխանության համառ պայքար է ընթանում, չեն զլանում անգամ մեկը մյուսին փչացնելուց, իսկ դե Սյունիքի խնդիրները կլուծվեն իրենք իրենց...