Իշխանության յուրայինների նեղ «թայֆայական» շահերն՝ օրենքից վեր

Երեկ հայտնի դարձավ, որ ապրիլի 26-ին Երևանի Պրոնյան-Լեո փողոցների խաչմերուկում Արարատի մարզի բնակչուհի, 29-ամյա Սոնա Մնացականյանին մահվան ելքով վրաերթի ենթարկած, Արարատի մարզի բնակիչ, 51-ամյա Արամ Նավասարդյանի նկատմամբ  խափանման միջոց է ընտրել ստորագրություն բնակության վայրից չհեռանալը: Եթե դատարանը բավարարեր քննիչի միջնորդությունը, ապա նա տեղափոխվելու էր ՀՀ արդարադատության նախարարության քրեակատարողական ծառայության «Վարդաշեն» քրեակատարողական հիմնարկ` ժողովրդին հայտնի «միլիցեքի բանտ»: Սակայն քննչական կոմիտեն այլ որոշում կայացրեց, և Փաշինյանի ավտոշարասյունը ուղեկցող մայորին անգամ մեղադրանք չի առաջադրվի:

Անշուշտ, սա առաջին դեպքը չէ, երբ Նիկոլ Փաշինյանի մերձավոր շրջապատը, կամ իշխանությունների համար վիզ դնողները խուսափում են օրենքի առջև պատասխանատվությունից: Դիցուք՝ Սյունիքի նախկին մարզպետ Մելիքսեթ Պողոսյանի որդին՝ Կարեն Պողոսյանը, որը մեղադրվում է սպանության փորձ կատարելու համար, ազատ է արձակվել կալանքից: Նրա նկատմամբ որպես խափանման միջոց է ընտրվել ստորագրությունը՝ չհեռանալու մասին։

ԱԺ «Քաղաքացիական պայմանագիր» խմբակցության պատգամավոր Սերգեյ Բագրատյանի որդին՝ 27-ամյա Շանթ Բագրատյանը, ով մեղադրվում է ապրիլի 2-ին Վայոց Ձորի մարզում գազալցակայանի տնօրեն 45-ամյա Վահե Ասատրյանին ծեծի ենթարկելու եւ մարմնական վնասվածքներ պատճառելու մեջ՝ նույնպես ազատ է արձակվել: Նրա նկատմամբ որպես խափանման միջոց է ընտրվել ստորագրությունը՝ չհեռանալու մասին։

Վերաքննիչ դատարանը ազատ է արձակել զենքի մատակարարմամբ զբաղվող Դավիթ Գալստյանին՝ բավարարելով պաշտպանների բողոքը:

2019-ի օգոստոսին Վայոց Ձորի մարզային քննչական վարչությունը հաղորդագրություն տարածեց, թե բացահայտվել է «Մավշին» ՍՊ ընկերության տնօրենի կողմից, պաշտոնեական դիրքն օգտագործելով, առանձնապես խոշոր չափերի՝ 4 միլիոնից ավելի դրամի առերեւույթ հափշտակություն կատարելու դեպք, որի հիման վրա վերջինիս մեղադրանք առաջադրվեց: Պետությանը պատճառված վնասը վերականգնելու նպատակով կալանք էր դրվել տնօրենին պատկանող գույքի վրա: Ըստ հրպարակումների՝ դա Մխիթար Մաթևոսյանն էր, ով 2000 թվականին մեղադրվել է այն ժամանակ Վայքում դատավոր Թոֆիլ Սամսոնիչիի տան շինարարական աշխատանքների ժամանակ կաֆել-մետլախի գողության համար: Մխիթար Մաթևոսյանի դեմ գործը սակայն շատ արագ կարճվեց, ինքն էլ դարձավ ՔՊ ցուցակով ընտրված համայնքապետ:

Նույնը տեղի ունեցավ ՀՀԿ-ական նախկին պատգամավոր Աշոտ Արսենյանի որդու՝ Վահագն Արսենյանի դեպքում:  Նրա նկատմամբ քրեական հետապնդումը դադարեցվել է, վերջինիս ներգրավմամբ հարուցված քրեական գործը` կարճվել:

Շաբաթներ առաջ Օձունի համայնքապետը Ոստիկանությունում հաղորդում է տվել իր նկատմամբ կատարված հանցագործության վերաբերյալ։ Արսեն Տիտանյանի խոսքով` իրեն իր մոտ է կանչել Լոռու  մարզպետ Արամ Խաչատրյանը և ներկայացրել հրաժարականի դիմում գրելու անօրինական պահանջ, որը չկատարելուց հետո էլ համայնքապետին ծեծի է ենթարկել: Այս դրվագով անգամ քրեական գործ չհարուցվեց, մարզպետ Արամ Խաչատրյանը պարզապես ջրից չոր դուրս եկավ:

Օրերս մամուլը գրել էր, որ ձերբակալվել է ԱԻՆ թիկունքի և նյութատեխնիկական ապահովման վարչության պետ Մհեր Մնացականյանը: Ըստ ԶԼՄ հրապարակումների՝ Մհեր Մնացականյանը հաղորդավար, մեկնաբան Նվեր Մնացականյանի որդին է: Ըստ մեր տեղեկությունների՝ նա ազատ է արձակվել։ Ասում են՝ Նվեր Մնացականյանը Նիկոլ Փաշինյանի հետ շատ մտերիմ է, և, թերևս, այդ հանգամանքն է պատճառը, որ ԱԻՆ պաշտոնյային ձերբակալել և հետո բաց են թողել։

Նմանատիպ թայֆայական մտածողության տեր էին նաև նախկին իշխանությունները, համենայնդեպս դրանում նրանց մշտապես մեղադրում էր ընդդիմադիր Նիկոլ Փաշինյանը` պնդելով, որ յուրայիններին Սերժ Սարգսյանը թույլատրում է գրեթե ամեն ինչ: Օրինակ` ընդդիմադիրները պահանջում էին աշխատանքից ազատել  ՀՀ արդարադատության նախարարության աշխատակազմի ղեկավարի տեղակալ Կամո Ադամյանին, ում մեղադրում էին ենթակային ծեծելու մեջ: Ընդդիմադիր ուժերին վրդովվեցնում էր այն, թե ինչպես կարող է մարդ ծեծած  Շատին համայնքի ղեկավար Տիգրան Խուդոյանը նորից նշանակվել այդ պաշտոնին և մեղադրում էին ՀՀԿ-ին յուրայինների հանցանքների վրա աչք փակելու մեջ: Երկար ժամանակ ընդդիմադիր Փաշինյանը հայտարարում էր, որ Ռուբեն Հայրապետյանի թիկնապահները և Մհեր Սեդրակյանի հարազատները մարդ են ծեծել և պետք է կրեն օրենքով սահմանված պատիժը, Ռուբեն Հայրապետյանին մասնավորապես, անվանելով  «բնության ճիչ»։

Ըստ էության, Նիկոլ Փաշինյանն այսօր անում է այն, ինչը համարում էր նախկինների գլխավոր մեղքը՝ թայֆաբազությունը, ինչպես ինքն էր արտահայտվում: Այսօր այդ մեղքը հպարտորեն իրենց վրա են վերցրել ՔՊ-ականները, որոնք, կարծես թե, եկել էին նման երևույթները բացառելու նպատակով և փորձում էին համոզել, որ օրենքի առաջ հավասար են լինելու բոլորը՝ վարչապետից մինչև դռնապան....