Հեղափոխականների և «մերժված թալանչիների» համատեղ բիզնեսները Նոր Հայաստանում

Հեղափոխությունից հետո Նիկոլ Փաշինյանը և նրա թիմակիցները բազմիցս էին հնչեցնում ԴԱՀԿ նախկին պետ Միհրան Պողոսյանի անունը` վերջինիս անվանելով «օֆշորի արքա» և մեղադրելով ի պաշտոնե կատարած թալանի, ապօրինի հարստացման մեջ: Վերջինիս և նրա ընտանիքի գույքը օրեր առաջ կալանքի տակ առնվեց, իսկ ինքը` Պողոսյանը, ըստ մամուլի հրապարակումների, կարողացել է հեռանալ երկրից, և իշխանություններին դեռևս չի հաջողվում գտնել նրան:

Սակայն, ուշագրավ է, որ Պանաման նվաճած գեներալի և նրա կատարած ապօրինությունների դեմ կատաղի պայքար հռչակած իշխանությունները անչափ լոյալ են նայում նրան, որ Փաշինյանի նշանակած հեղափոխական պաշտոնյաներից մեկը բիզնես է հիմնում Պողոսյանի ազգականի հետ: Բանն այն է, որ Սննդամթերքի անվտանգության տեսչական մարմնի ղեկավարի տեղակալ Արթուր Շատվորյանը 2019 թ. մայիսին համատեղ ընկերություն է հիմնել Տիգրան Հարությունյանի հետ, ով ԴԱՀԿ ծառայության նախկին պետ, գեներալ-մայոր Միհրան Պողոսյանի քեռու՝ Միխաիլ Հարությունյանի որդին է:

Տիգրան Հարությունյանը հանրությանն առավել հայտնի է որպես երեւանյան «կարմիր գծերի» շահագործող «Փարքինգ Սիթի Սերվիս» ՓԲԸ-ի սեփականատեր: Մեծ աղմուկ հանած այս ընկերությունը, հիշեցնենք, հետագայում անցավ Երեւանի քաղաքապետարանին: Տ. Հարությունյանը նաեւ շինարարական «Միկշին» ՍՊԸ-ի հիմնադիրն է: Այս ընկերությունն է իրականացրել, մասնավորապես, Երեւանի Երազ թաղամասի կառուցապատումը:  «Թավշյա հեղափոխությունից» մեկ տարի անց Արթուր Շատվորյանի ու Տիգրան Հարությունյանի հիմնած ընկերության անունը՝ «Վելվետ Բիլդինգ» ՓԲԸ: Գործընկերների բաժնետոմսերի հարաբերակցությունը եղել է 50-50: Ըստ հայտարարագրի՝ պաշտոնի ստանձնման օրը Շատվորյանը 5 տարով հավատարմագրային կառավարման է հանձնել այս ընկերության իր փայաբաժինը:

Փաստորեն, հեղափոխականները ոչ միայն չկարողացան վերադարձնել Միհրան Պողոսյանի կողմից «թալանվածը», դեռ մի բան էլ վերջինիս ընտանիքի անդամների հետ հաջող կերպով բիզնես են անում, տենդերներ շահում: Արդյո՞ք սա որևէ կերպ չի հակասում Փաշինյանի կողմից հռչակած հեղափոխության իդեալներին, քանի որ ակնհայտ է՝ մերժված նախկինների համար ոչ միայն նոր քաղաքական հորիզոններ են բացում ՔՊ-ականների ձեռքով, նրանց շնորհվում է այս կամ այն բարձր պաշտոնը, այլ նախկին-ներկա համագործակցությունը արտահայտվում է արդեն նաև բիզնես համագործակցությամբ: Ինչպես ասում են՝ բիզնես է, ոչ մի անձնական բան....