ՔՊ-ականների՝ բանակում չծառայած որդիների անունները կփոխանցվե՞ն ԱԱԾ-ին

ԱԺ պաշտպանության հանձնաժողովի նախագահ Անդրանիկ Քոչարյանն այսօր հանդես է եկել հայտարարությամբ` կոչ անելով ՀՀ ոստիկանությանը և Ազգային անվտանգության ծառայությանը հավաքագրել ցույցի մասնակից քաղաքացիների տվյալները և դրանք փոխանցել ՀՀ պաշտպանության նախարարությանը, որն էլ իր հերթին կօգտագործի այս «լավ պատրաստված», պարզ հրահանգներ կատարելու ունակ երիտասարդներին՝ մեր բանակի մոբիլիզացիոն ռեսուրսը հարստացնելու և նրանց` Հայաստանի ու Արցախի սահմանների անվտանգության պահպանման գործում ներգրավելու նպատակով։

Քոչարյանի հայտարարության զավեշտը կայանում է նրանում, որ վերջինիս որդին նույնպես բանակից ազատված է՝ անհայտ պատճառներով: Սակայն, դա վերաբերվում է ոչ միայն Անդրանիկ Քոչարյանի որդուն, բանակից ազատված են նաև նրա թիմակիցներից մի քանիսի որդիները: Զինծառայությունից ազատված են իշխանական պատգամավոր Վահե Ղալումյանի երկու որդիները՝ Աշոտ և Վլադիմիր Ղալումյանները: Զինծառայությունից ազատված է ՔՊ-ական պատգամավոր Հովիկ Աղազարյանի կրտսեր որդին՝ Հովսեփը: Զինծառայությունից ազատված են «Քաղաքացիական պայմանագիր» կուսակցության ներկայացուցիչ, պատգամավոր Վահագն Հովակիմյանի երկու որդիները՝ Միսակ և Նարեկ Հովակիմյանները: Այժմ «Քաղաքացիական պայմանագիր», նախկին գումարումներում՝ «Բարգավաճ Հայաստան» խմբակցությունը ներկայացնող Գուրգեն Արսենյանի կրտսեր որդին: Զինծառայությունից ազատված է այժմ իշխող ուժի պատգամավոր Վիգեն Խաչատրյանի որդին՝ Սուրեն Խաչատրյանը:

Հարց է առաջանում՝ իսկ Անդրանիկ Քոչարյանը պատրաստվո՞ւմ է ԱԱԾ-ին հանձնել իր և իր գործընկերների որդիների անունները, որպեսզի ՊՆ-ն ուսումնասիրի նաև վերջիններիս բանակից ազատվելու հիմքերը, թե այս պայծառ գաղափարը ուղղված է միայն ՔՊ-ի քաղաքական ընդդիմախոսների դեմ: Եթե Քոչարյանը անկեղծ է իր մղումներում, ապա, ինչպես ասում են,պետք է սկսի իրենից և իր թիմակիցներից....