Ինչո՞ւ են Վանեցյանն ու Օսիպյանը «խնայում» Նիկոլ Փաշինյանին

Հայաստանում այս օրերին Նիկոլ Փաշինյանի հրաժարականի պահանջով բողոքի ակցիաները նոր թափ են հավաքել: Ընդդիմությունը ապակենտրոն և ցանցային պայքար է հայտարարել, իսկ կենտրոններից մեկը Արթուր Վանեցյանի գլխավորած թևն է, որի կազմում են Վանեցյանի կողմնակիցները և «Պատիվ ունեմ» խմբակցության անդամները:

Արթուր Վանեցյանը հեռացավ զբաղեցրած պաշտոնից և հայտարարեց, որ կանգ առնելու ժամանակն է: Շաբաթներ անց, խոսելով լրագրողների հետ, ԱԱԾ նախկին պետը հայտարարեց, որ պաշտոնավարման ընթացքում վարչապետ Նիկոլ Փաշինյանից ապօրինի հրամաններ է ստացել:

Ցույցերին այս օրերին միացել է և նույնիսկ ճանապարհ է փակում նախկին ոստիկանապետ Վալերի Օսիպյանը : Ընդամենը օրեր առաջ նա հայտարարել էր ՝ «Ես ապօրինի հրաման ստացել եմ Նիկոլ Փաշինյանից, բայց չեմ կատարել»: Օսիպյանը չպատասխանեց, թե արդյոք դա է եղել իր հրաժարականի պահանջը:

Այսինքն` երկու պաշտոնաթող գեներալներն էլ հայտարարում են , որ պաշտոնը զբաղեցնելու ընթացքում վարչապետից ստացել են ոչ օրինական հրամաններ, սակայն դրանց մասին կխոսեն երբ հասունանա պահը:  Հարց է առաջանում` իսկ ինչո՞ւ այսօր ընդդիմության դաշտ տեղափոխված նախկին բարձրաստիճան պաշտոնյաները հրապարակավ չեն բացահայտում, թե հատկապես ինչ ապօրինի հրամաններ են ստացել վարչապետից, չէ որ այդ բացահայտումը կարող է դառնալ քրեական գործի հարուցման հիմք և արդյունքում` նաև բերել Նիկոլ Փաշինյանի իշխանությունից հեռացնելուն: Արդյո՞ք այդ նպատակը չեն հետապնդում այսօր Երևանի փողոցներում բողոքի ակցիաներ իրականացնող Վանեցյանն ու Օսիպյանը, եթե այո, ապա ինչու չի մերկացվում Փաշինյանի հակաօրինական պահվածքը, որը նա ցուցաբերել է ի պաշտոնե: Սա, թերևս, կլիներ ավելի տրամաբանական, քան վարչապետին և իշխող քաղաքական թիմին հեռանալու դեպքում հումանիտար միջանցք  խոստանալը....