Նիկոլ Փաշինյանի հույսը Սերժ Սարգսյանի կադր Արթուր Ջավադյա՞նն է

ՀՀ վարչապետի որոշմամբ կստեղծվի տնտեսական քաղաքականության խորհուրդ, տեղեկանում ենք e-gov.am-ից: Խորհրդի նախագահը վարչապետն է, իսկ նախագահի տեղակալը՝ «Տնտեսական հեռանկարների կենտրոն-հիմնադրամ» հոգաբարձուների խորհրդի նախագահ, Կենտրոնական բանկի նախկին նախագահ Արթուր Ջավադյանը։ «Խորհուրդը բաղկացած է Հայաստանի և միջազգային հեղինակություն ունեցող օտարերկրյա ականավոր գիտնականներից, հասարակական գործիչներից, փորձագետներից և ՀՀ վարչապետի որոշմամբ նշանակվող այլ անձանցից։ Խորհրդի անդամներն իրենց գործառույթները կատարում են անհատույց կարգով»,- ասված է որոշման մեջ։

Ուշագրավն այս որոշման մեջ այն է, որ ընդհանրապես նման խորհուրդները գլխավորում  են պրոֆիլային կառույցների ղեկավարները, հետևաբար, այս դեպքում էլ վարչապետի հետ մեկտեղ նորաստեղծ խորհուրդը պետք է ղեկավարեր Վահան Քերոբյանը: Սակայն, արի ու տես, որ Նիկոլ Փաշինյանի ընտրությունը կանգ է առել ոչ թե իր յուրային և թիմակից համարվող Քերոբյանի, այլ նախկինների նախկին՝ Ջավադյանի վրա: Սա բավական ուշագրավ է` հաշվի առնելով, որ մամուլում վերջերս համառորեն պտտվում է Քերոբյանի մոտալուտ հրաժարականի մասին լուրը:

Ինչևէ, այս նշանակման մեջ կա ևս մեկ ուշագրավ դրվագ: Բանն այն է, որ ընդդիմադիր Նիկոլ Փաշինյանը ամեն պատեհ առիթը օգտագործում էր քննադատելու ԿԲ նախագահ Ջավադյանին և կասկածի տակ դնելու նրա մասնագիտական կարողությունները: Նա նրան նաև անվանում էր Սերժ Սարգսյանի հավատարիմ կադր:

Ստացվում է՝ Ջավադյանի տնտեսական հաշվարկները այլևս ծիծաղ չեն առաջացնում Նիկոլ Փաշինյանի մոտ, ավելին՝ Փաշինյանի՝ տնտեսության վերակենդանացման հույսը հենց այն Ջավադյանն է, ում տնտեսագիտական կարողությունների հանդեպ թերահավատորեն էր վերաբերվում ընդդիմադիր Նիկոլ Փաշինյանը...