Հրաչյա Սարգսյանի «հեղափոխական» և «աննախադեպ» ծրագիրը

Երևանի քաղաքապետարանը մտադիր է մայրաքաղաքում վճարովի ավտոկայանատեղիների համար նախատեսված կարմիր գծանշումներն այսուհետ ներկել կապույտ գույնով։ Կառավարության համապատասխան որոշման նախագիծը  հանրային քննարկման է ներկայացվել իրավական ակտերի նախագծերի հրապարակման կայքում։

Ինչպես երևում է՝ Երևանի քաղաքապետարանում մոռացել են, որ 2018-ին ՔՊ-ն եկավ իշխանության` խոստանալով ընդհանրապես վերացնել Սաշիկ Սարգսյանի (իրենց խոսքերով) բիզնեսը: Սակայն հետո որոշեցին, որ ամեն դեպքում քաղաքացին տուգանքի մատերիալ է: Այժմ էլ որոշել են, որ Երևանում ամենահապճեպ լուծումը պահանջող, ամենաօրակարգային խնդիրը դա կարմիր գծերի ռեբրենդինգն է:

Նախագծի հիմնավորման մեջ ասվում է, որ անցած տարիների փորձը, ինչպես նաև քաղաքացիներից ստացված բազմաթիվ բողոքները, դժգոհությունները և ահազանգերը վկայում են այն մասին, որ կարմիր գույնի գետնանշումը բավարար տեսանելի և ընկալելի չէ աչքի համար: Դժվար է ասել, թե այդ ինչ դաժան փորձի և տուժած քաղաքացիների վրա են հղում արել սույն նախագիծը կազմելիս, բայց փաստ է՝ Հրաչյա Սարգսյանը իրեն արդարացնում է և որոշել է իրագործել հիրավի «հեղափոխական» և «աննախադեպ» մի ծրագիր:  Այն, որ Երևանում բազմաթիվ վթարային շենքեր են դեռևս առկա, մահվան վերելակներ, կանգառներ որոնք գտնվում են, մեղմ ասած, վատ վիճակում, չկան ապաստարաններ՝ դա, իհարկե, խնդիր չէ, կամ այսպես ասենք՝ իհարկե խնդիր է, բայց օպերատիվ լուծում չի պահանջում: Կասկածից էլ վեր է, որ կարմիր գույնը կապույտով փոխելը բյուջեի վրա կլորիկ գումար կնստի, որը կարող էր ուղղվել դիցուք՝ վերը նշված խնդիրների լուծմանը: Նախորդ տարիների փորձը և բազմաթիվ քաղաքացիների բողոքները վկայում են այն մասին, որ այդ խնդիրներն էլ են շտապ լուծում պահանջում: