Լրատվամիջոցներից «դուխով» ճողոպրող ՔՊ-ական պաշտոնյաները

Հեղափոխության հաղթանակից հետո վարչապետի աթոռը զբաղեցրած Նիկոլ Փաշինյանը խոստացել էր, որ իր թիմը չի շարունակելու նախկինների արատավոր ավանդույթը և իր հեղափոխական թիմակիցները սև մուտքերով չեն ճողոպրելու լրատվամիջոցների աշխատակիցներից, մշտապես լինելու են հասանելի, բաց և թափանցիկ:

Սակայն, հեղափոխությունից չորս տարի անց լրագրողներին ընդհանրապես թույլ չեն տալիս մոտենալ ՔՊ-ական պաշտոնյաներին և վերջիններիս հարցեր ուղղել:

Վերջին չորս տարիների ընթացքում Փաշինյանի խոստումն ակնհայտորեն գրվել է սառույցին, քանի որ նրա թիմի բազմաթիվ ներկա և նախկին ներկայացուցիչներ այս ընթացքում հաջողությամբ և դուխով ճողոպրել են լրագրողներից, ասել է թե՝ անհարմար հարցերից:

Առողջապահության նախարարի պաշտոնը զբաղեցրած Արսեն Թորոսյանը փախչում էր անգամ սեփական ասուլիսից:

Նույնը կարելի է ասել ՊՆ փոխնախարարի մասին:

Վահան Քերոբյանը՝ էկոնոմիկայի նախարարը, հաճախ է վիրավորում լրագրողներին, միայն թե խուսափի անհարմար հարցերին պատասխանելուց և պարզապես ավարտի ասուլիսը՝ արագ հեռանալով:

Լրագրողներից մշտապեց ճողոպրում է ԱԺ պատգամավոր Անդրանիկ Քոչարյանը, հատկապես, երբ նրան փորձում են հարց ուղղել կապված հայ-ադրբեջանական խաղաղության օրակարգի մասին:

Դեռևս ԱԳ փոխնախարար աշխատած տարիներին լրագրողներից խուսափում էր Ռուբեն Ռուբինյանը:

ԱԺ պատգամավոր Լենա Նազարյանը նույնպես ունի նման սովորություն և փորձառություն:

Արարատի նախկին մարզպետ Ռազմիկ Թևոնյանը նույնպես անչափ օպերատիվ էր այն հարցերում, որոնք վերաբերվում էին լրագրողներից ճողոպրելուն:

Ինչպես հասկանում ենք՝ Փաշինյանի թիմակիցները կամ սխալ են հասկացել 2018-ին հնչեցրած նրա պատվիրանները, կամ իսկապես հպարտ քաղաքացիներից թաքցնելու շատ բան ունեն և հենց դրանով է պայմանավորված այն հանգամանքը, որ վերջիններս լրատվամիջոցների հետ որևէ շփում ունենալ չեն ցանկանում և ամեն գնով` անգամ դուխով ճողոպրելու գնով դրանից խուսափում են: