Վահան Քերոբյանը «հպարտանալու» հերթական առիթն է գտել

Էկոնոմիկայի նախարար Վահան Քերոբյանը թվեր է ներկայացրել ներգնա զբոսաշրջության տեմպերի վերաբերյալ։ Նրա տեղեկացմամբ, ապրիլ ամսին ներգնա զբոսաշրջիկների քանակը կազմել է 96,938։ 

Ըստ էության, նախարարը փորձել է այս տվյալները հրամցնել հանրությանը իբրև հերթական աննախադեպ ձեռքբերում, որն անշուշտ գրանցվել է կառավարության անմարդկային ջիգերի ու ջանքերի արդյունքում: Սակայն, եթե նայում ենք նախորդ տարիների ապրիլ ամսվա կտրվածքով, ապա պարզ է դառնում, որ որևէ արտառոց բան տեղի չի ունեցել, հառակը՝ հպարտանալու առիթ այնքան էլ չի նշմարվում:

Նախորդ տարիների տվյալները հետևյալն են` 2021-ին` 41,881, 2020-ին` 0; 2019-ին` 137,597,  2018-ին` 133,205, 2017-ին` 116,485, 2016-ին` 93,079։

2020-ի 0-ն ինչ-որ կերպ հասկանալ կարելի է՝ պատերազմ, համավարակ և ինչպես ասում են՝ ներգնա տուրիզմի ժամանակը չէր: Սակայն, մենք տեսնում ենք, որ 2018-ի տվյալները նախ այնքան էլ չեն գերազանցում մինչ հեղափոխական տարիների ցուցանիշները, բացի այդ հեղափոխությունից հետո ակնհայտ է, որ շեշտակի աճ տեղի չի ունեցել, հակառակը՝ այս տարի ապրիլին նախորդ տարիների համեմատ ավելի քիչ թվով ներգնա զբոսաշրջիկներ ենք ունեցել: 

Գաղտնիք չէ, որ ներգնա տուրիզմի ոլորտի ընկերություններն այս տարիներին հաճախ են դիմել կառավարությանը` որոշակի օժանդակություն ստանալու համար, սակայն հանդիպել են կամ խուլ պատերի, կամ նորանոր սահմանափակումների, որոնք անշուշտ չէին կարող նպաստել ոլորտում առկա ընկերությունների խնդիրների բեռի թեթևացմանը: Հետևաբար, այս անկման մեջ բազմաթիվ գործոնների կողքին առկա է նաև կառավարության մեղքը: