Փնտրվում է մեղավոր. ՔՊ-ում սկսել են «սլաքներն» իրար վրա ուղղել

Սփյուռքի գործերի գլխավոր հանձնակատար Զարեհ Սինանյանը և էկոնոմիկայի նախարար Վահան Քերոբյանը փորձում են մեկը մյուսին մեղադրել սփյուռքից Հայաստան եկող ներդրումների էական կրճատման համար

Դիցուք՝ Սփյուռքի գործերով գլխավոր հանձնակատար Զարեհ Սինանյանը այն կարծիքին է, որ Թավշյա հեղափոխության ընթացքում սփյուռքը ոգևորված էր այն հնարավորություններով, փոփոխություններով և տեսլականով, որ իր հետ բերելու էր հեղափոխությունը: Հիմա այդ փոփոխություններն ընթացքի մեջ են: Մեծ ներգաղթի համար էլ նախևառաջ պետք է ստեղծվեն նախապայմաններ, իսկ դրա համար մենք շատ պետք է աշխատենք, շտկենք նաև նախորդ 30 տարիների աններելի սխալները, իսկ ներդրումների ծավալները ըստ Սինանյանի, սպասվածից ցածր են:

Անդրադառնալով էկոնոմիկայի նախարար Վահան Քերոբյանի խոսքին, որը վերաբերում է բարենպաստ բիզնես միջավայրի զարգացմանն ու այն ներդրումներին, որոնք պետք է կատարեն գործարարները, Սինանյանն ասաց. «Դժվար է չափել Քերոբյանի ասած ներդրումների հոսքը»։ 

Իսկ ահա Վահան Քերոբյանը հետաքրքիր կարծիք ունի այս հարցի վերաբերյալ: Նա գտնում է, որ Սփյուռքի օգնությունը իրականում վնասաբեր է Հայաստանի համար, մենք պետք է կարողանանք սփյուռքի հետ գործնական և փոխշահավետ հարաբերություներ ձևավորենք և պետք է նրանց տանք ապահովություն՝ ներդրումների դիմաց: Դրա համար, ըստ Քերոբյանի, մեծ ծավալի տնային աշխատանք կա կատարելու և պետք է միշտ նկատի ունենալ, որ ամենահավանական ներդրողը տեղացիներն են, երկրորդը՝ սփյուռքահայերը և նոր օտարերկրացիները: Արդյո՞ք սա քար չէ նետված հենց Սինանյանի այգին, և արդյո՞ք Քերոբյանը նկատի չունի, որ տնային աշխատանքում թերանում է հենց Սինանյանը:

Ըստ երևույթին, իրենց վստահված ոլորտները հիմնովին տապալած երկու պաշտոնյաները դեռ երկար կվիճեն, թե ում պատճառով է սփյուռքը կրճատել իր ներդրումները Հայաստանում, մինչդեռ փաստը մնում է փաստ` ՀՀ իշխանություններն ամեն ինչ արել են, որպեսզի սփյուռքը հիմքեր ունենա նրանց չվստահելու համար...