Ալավերդիում ՔՊ–ականների «արշալույսները» խաղա՞ղ չեն

Ի թիվս Հայաստանի մի շարք համայնքների՝ Ալավերդին նույնպես կխոշորացվի։ Տեղական ինքնակառավարման մարմինների ընտրություններ այստեղ այս տարվա աշնանն են նախանշված։ Ըստ նախնական տեղեկությունների՝ Ալավերդին կխոշորանա՝ ընդգրկելով նախկին Թումանյանի տարածաշրջանի համայնքները, այդ թվում՝ Ախթալա, Շամլուղ, Թումանյան քաղաքաներն ու մի քանի տասնյակի հասնող գյուղեր։ Խիստ նախնական հաշվարկներով՝ խոշորացված Ալավերդի համայնքում ընտրելու իրավունք 24 հազար քաղաքացի կունենա։

Իշխանությունները, այս պահից սկսած, մտածում են՝ ո՞ւմ առաջադրեն, որպեսզի առավելագույն ձայներ կարողանա հավաքել։ Մամուլի տեղեկությունների համաձայն` հավանական թեկնածուներից մեկն Ազգային ժողովի պատգամավոր, ծնունդով ալավերդցի Արեն Մկրտչյանն է։ Նա, ի դեպ, արդեն իսկ ակտիվորեն լծվել է քարոզչությանը, չնայած` ընտրություններին դեռ շատ ժամանակ կա:

Ինչպես և սպասվում էր` ՔՊ-ում ընտրություններից առաջ կրքերն սկսում են եռալ և թեժանում է պաշտոնակռիվը: Ալավերդին այս առումով նույնպես բացառություն չէ: Ալավերդիում հաճախ է լինում նաև Արսեն Թորոսյանը, չի բացառվում, որ վերջինս էլ այս ընտրությունների հետ կապված սեփական հաշվարկներն ու ծրագրերն ունի: Բանն այն է, որ, օրինակ, Ալավերդու ԲԿ-ի ղեկավարը համարվում է նրա մտերիմը և ինչու չփորձել առաջ քաշել հենց վերջինիս թեկնածությունը:

Գալիք ընտրություններում Ալավերդիում իր խոսքը կարող է ասել նաև Լոռու նախկին մարզպետ Անդրեյ Ղուկասյանը, ով մինչ օրս էլ պահպանում է իր ազդեցության լծակները մարզում և կարող է սեփական թեկնածուին առաջ տանել՝ խոստանալով ձայներ ապահովել ՔՊ-ի համար:

Ինչպես տեսնում ենք՝ նախընտրական կրքերը մշտապես թեժացնում են ՔՊ-ում առանց այդ էլ երբեք չմարող կրքերը և արդյունքում` թիմային ոգին ու միասնականությունը իր տեղը զիջում է իշխանության համար համառ պայքարին: