Ռուստամ Բադասյանը հանցագործության մասին հաղորդո՞ւմ է տալիս Շուշանիկ Ներսիսյանի դեմ

Վերջին օրերին մամուլում տեղեկություններ են տարածվում առ այն, որ ՊԵԿ փոխնախագահ, մաքսային ոլորտը համակարգող Շուշանիկ Ներսիսյանը հնարավոր է՝ դիմում գրի-հեռանա, քանի որ ՊԵԿ նախագահ Ռուստամ Բադասյանը նրա գործունեության մեջ չարաշահումներ, կոռուպցիոն դրսեւորումներ է հայտնաբերել եւ դրանք ներկայացրել է Նիկոլ Փաշինյանին։ Սակայն, քանի որ Շուշանիկ Ներսիսյանը հանդիսանում  է Նիկոլ Փաշինյանի ընտանիքի մտերիմը՝ վարչապետը, բնականաբար, դեմ է արտահայտվել նրա նկատմամբ որևէ գործողություն իրականացնելուն և հրահանգել է յուրայինին ձեռք չտալ:

Բադասյանը, իհարկե, իր հարցազրույցներում թեև հերքել է նման տեղեկատվությունը, սակայն մյուս կողմից էլ հայտարարել, որ, բնականաբար, խնդիրները շարունակում են շատ մնալ, այո, կան նաեւ կոռուպցիոն հնարավոր դրսեւորումներ, նման տեղեկություններ եւ նման ռիսկեր անընդհատ լինում են, դրա մասին խոսում են, դրանցով զբաղվում են: 

Հասկանալի է, որ Բադասյանը չէր կարող բաց տեքստով ասել, որ այդ խնդիրները մաքսային ոլորտում ի հայտ են գալիս իր տեղակալի ոչ կոմպետենտության պատճառով` հաշվի առնելով նաև այն հանգամանքը, որ Ներսիսյանը գտնվում է Փաշինյանի անձնական պաշտպանության տակ: Սակայն, պարզից էլ պարզ է, որ եթե առկա են խնդիրներ, ապա այդ խնդիրների թիվ մեկ մեղավորը և թիվ մեկ պատասխանատուն՝ ոլորտը կուռացիա անողն է, այս դեպքում՝ Ներսիսյանը: Ըստ այդմ, Բադասյանի այս հայտարարությունը ընդհանրապես կարելի է դիտարկել իբրև հանցագործության մասին հաղորդում՝ իր տեղակալի դեմ, որքան էլ որ դա ուռճացված չհնչի: Մնում է հասկանալ, թե որքան է շարունակելու վարչապետը աչք փակել պարբերաբար մամուլում և գործարարների կողմից հնչեցված ահազանգերի վրա...