Երևանցիներին «կայսերական» ծրագրեր հրամցնող Հրաչյա Սարգսյանն «անլուծելի» խնդրի է բախվել

Երևանի քաղաքապետ Հրաչյա Սարգսյանը, ով շարունակում է ավագանու նիստերի ընթացքում իրեն բնորոշ ոճով հաթաթա տալ աշխատակիցներին, հերթական անգամ ավետել է նոր կայսերական ծրագրերի մասին: 

Տրանսպորտային ցանցի արդիականացումից, նոր այգիների կառուցումից հետո այժմ էլ քաղաքապետը լծվել է պոլիկլինիկաների ցանցի արդիականացմանը, 460 նոր վերելակի տեղադրմանը և  Երևանյան լճի հարակից տարածքի բարեկարգմանը, Հրազդանի կիրճը՝ նախկին պաշտոնյաների օբյեկտներից մաքրելուն: Սրան չմոռանանք գումարենք, իհարկե, մետրոյի նոր կայարանի կառուցումը, որի վրա հաջողում է փիառվել` ինչպես գործող քաղաքապետը, այնպես էլ Երևանի քաղաքապետի գալիք ընտրություններում ՔՊ թեկնածու Տիգրան Ավինյանը:

Ինչևէ, չնայած այս, ինչպես նշեցինք, կայսերական  ծրագրերի, Երևանի քաղաքապետը չի շտապում լուծում տալ մի քանի օր առաջ Ծիծեռնակաբերդի խճուղու մի հատվածի փլուզմանը, մինչդեռ դա հենց քաղաքապետարանի լիազորությունների շրջանում է: Երևանի քաղաքապետարանը ընդամենը տեղեկացրել է, որ Ծիծեռնակաբերդի խճուղում փլուզման պատճառով տրանսպորտային 6 երթուղիներում կատարվել են ուղեգծերի ժամանակավոր փոփոխություններ։ Սակայն, հասկանալի չէ, թե դեռ որքան ժամանակ է երևանցիներին անհարմարություն պատճառվելու, քանի որ ամեն առիթով բարկացող և մատ թափ տվող քաղաքապետ Հրաչյա Սարգսյանը այս անգամ չի շտապում բարկանալ և մատ թափ տալ ճանապարհը կառուցող և փաստացի դրա որակի համար պատասխանատու շինարարական ընկերության վրա: Ավելին՝ քաղաքապետարանը ընդհանրապես չի շտապում մատը մատին խփել, կարծես խնդիր ընդհանրապես գոյություն չունի:

Եվ այսքանից հետո, իհարկե, տրամաբանական հարց է առաջանում` ինչպե՞ս է Հրաչյա Սարգսյանը կյանքի կոչելու իր կայսերական ծրագրերը, եթե մեկ շաբաթ է ի վիճակի չէ լուծել մի քանի մետր ճանապարհահատվածի վերականգնման հարցը....