Նիկոլ Փաշինյանի և թիմակիցների «անկլավային» մանիպուլյացիաները

Միշել-Փաշինյան-Ալիեւ եռակողմ բանակցություններից հետո Եվրոպական խորհրդի նախագահ Շառլ Միշելի հայտարարության մեջ հստակ ուրվագծվում են «խաղաղության պայմանագրի» պայմաններն ու դրույթները։ Միշելի հայտարարության մեջ «Արեւմտյան Ադրբեջանի ու Նախիջեւանի կապի» հիշատակումը նշանակում է Բաքվի՝ Լեռնային Ղարաբաղի որպես քաղաքական-աշխարհագրական միավորի վերացման պահանջների արձանագրումը, համաձայն վարչատարածքային նոր բաժանման վերաբերյալ Ալիեւի հրամանագրի, ինչպես նաև ՀՀ տարածքում գտնվող մի շարք գյուղերի հանձնում, դրանք էլ, ըստ Ալիևի, ադրբեջանական անլավներ են:

Ուշագրավ է, որ ամիսներ շարունակ ՀՀ բարձրաստիճան պաշտոնյաները ստել են հանրությանը` պնդելով, որ անկլավների փոխանակման, հանձնման  հարց չի քննարկվում

Վարչապետ Նիկոլ Փաշինյանը մեկ տարի առաջ խիստ կասկածում է, որ անկլավների հարցն ունի իրավական հիմք: Այդ մասին նա հայտարարել է նոյեմբերի 23-ին առնցանց ասուլիսին՝ պատասխանելով հարցին, թե բանակցային սեղանին դրված է անկլավների փոխանակման հարցը։ «Պետք է հասկանալ՝ անկլավներն ունե՞ն իրավական հիմք, թե՞ ոչ։ Մենք խիստ կասկածում ենք, որ դա իրավական հիմք ունի», - նշել էր Փաշինյանը՝ նկատելով, որ Ադրբեջանը հետապնդում է անկլավների հարց, նույնիսկ նոյեմբերի 9-ին փորձ է արվել անդրադարձ կատարել այդ հարցին։

Չնայած ակնհայտ փաստերի, որ Վայոց Ձորում առկա են երևույթներ, որոնք որևէ կերպ չեն բխում ՀՀ շահերից, Վայոց Ձորի մարզպետը հայտարարում է, որ սահմանները վերահսկելի են և անվտանգ։ Սահմանային բնագծերի փոփոխություններ չկան։ Բացի այդ, նա հաթաթա է տալիս լրատվամիջոցներին, որոնք, ըստ իրեն, մանիպուլացնում են տեղեկատվությունը: 

Նախորդ տարվա Մայիսի 24-ին այդ ժամանակ «Իմ քայլը» խմբակցության պատգամավոր Վահե Ղալումյանը հարցազրույցում ասաց, որ Տավուշի մարզում կան ադրբեջանական անկլավներ, որոնք գտնվում են Հայաստանի վերահսկողության տակ ու նույնիսկ թվարկեց դրանք: Միևնույն ժամանակ, ըստ Ղալումյանի, դրանց փոխանակման կամ վերադարձի հարց չէր քննարկվում:

2021 թվականի հունվարի 4-ին այն ժամանակ դեռ Արարատի մարզպետ Գարիկ Սարգսյանը ֆեյսբուքյան իր էջում գրել էր. «Ցավի ու կորստի քաղաքական կապիտալիզացիայի շրջանակներում նախկին վարչապետ Հրանտ Բագրատյանը հերթական հիմարությունն է բստրել, հիմա էլ պնդում է, թե Քյարքին տալիս են, Սյունիք գնալ չի լինելու։ Հ.Գ. «Ազգափրկիչներին» հարցրեք, եթե իրենք այդքան ինֆորմացված են, թող մեզ ասեն նաև Տիգրանաշենի (Քյարքիի) «հանձնելու» կոնկրետ օրը։ Այդ դեպքում, «հանձնելու» հաջորդ օրը, ես իրենց հրավիրում եմ Քյարքի` խաշ ուտելու»։

Օրեր առաջ իր ելույթում ԱԽ քարտուղար Արմեն Գրիգորյանը անդրադարձել է անկլավների թեմային` նշելով մասնավորապես հետևյալը:  «Մինչև այս պահն անկլավների հարց չի բարձրացվել: Կարելի է ասել, որ երկու կողմից էլ (Հայաստանի և Ադրբեջանի- խմբ)անկլավ կա, և դրանց տարածքները գրեթե հավասար են, երկու կողմն էլ լուռ է այս հարցում և այն դեռևս չի  քննարկվել: Մեր հույսն այն է և հնարավոր լուծման տարբերակն այն է, որ  Հայաստանի անկլավը թողնվում է Ադրբեջանին, Ադրբեջանի անկլավները, որոնք Հայաստանի տարածքում են, մնում են Հայաստանին: Իհարկե, կա այսպիսի հարց, թե ինչպես են դրանք առաջացել, որոնք շարունակում ենք ուսումնասիրել, բայց ընդհանուր երկարաժամկետ տարբերակը սա է»,- ասել է Գրիգորյանը։ Մինչդեռ ուշագրավ է, որ ընդամենը ամիսներ առաջ Գրիգորյանը այլ հայտարարություններով էր հանդես գալիս: Մասնավորապես, Արմեն Գրիգորյանը 2021 թվականի դեկտեմբերի 21-ին հայտարարել է՝ անկլավների հարց չկա, քանզի մեր ուսումնասիրությունները ցույց են տվել, որ Հայաստանի տարածքում անկլավներ չկան: «Եղել են սովետական շրջանում տարբեր տարիներին տարբեր սովխոզների միջև տարածքների փոխանակում, բայց դրանք անկլավներ չեն: Ուստիև, կարծում եմ, որ սահմանազատման և սահմանագծման գործընթացի արդյունքում Հայաստանի ներկայիս սահմանները առանձնապես չեն փոխվի, քանզի անկլավների հարց ՀՀ տարածքում առկա չէ, կա Արծվաշենի անկլավի հարցը, որը ներկայումս գտնվում է Ադրբեջանի տարածքում»,- հավաստել էր Անվտանգության խորհրդի քարտուղարը:

ՔՊ-ական պատգամավոր Վիգեն Խաչատրյանը, մեկ շաբաթ առաջ խոսելով անկլավների վերադարձի հավանականության մասին, հայտարարել էր, որ ինքն համոզված է՝ այդ լուրը, որը տարածում է Ադրբեջանի ԱԳՆ-ն, կեղծիք է:

Այս ամենից հետո, ինչը այլ կերպ չես անվանի, քան հասարակությանը մոլորեցնել և հասարակության գլխի տակ փափուկ բարձ դնել, Բրյուսելում ՀՀ իշխանությունները ստանում են, մեղմ ասած, ոչ հայանպաստ ձևակերպում, ինչը ենթադրում է ՀՀ տարածքի փաստացի մասնատում...