Ռուբեն Ռուբինյանը Նիկոլ Փաշինյանին «հանցագործ» է համարո՞ւմ

Վերլուծական 24 Մայիս, 2022 21:20

ՀՀ ԱԺ նախագահի տեղակալ Ռուբեն Ռուբինյանը լրատվամիջոցներին տված հարցազրույցի ընթացքում ուշագրավ միտք է հայտնել: Ըստ ՔՊ-ական բարձրաստիճան պաշտոնյայի՝ «Չի կարելի արտաքին քաղաքական զգայուն թեմաները դարձնել ներքին շահարկման թեմա. սա հանցագործություն է մեր քաղաքացիների և սերունդների դեմ»։

Ռուբեն Ռուբինյանը ակնհայտորեն մոռանում է, որ ինչպես ինքն է արտահայտվում՝ արտաքին քաղաքական զգայուն թեմաները շահարկման առարկա առաջին անգամ դարձրել է իր քաղաքական թիմի ղեկավար Նիկոլ Փաշինյանը՝ հեղափոխական ամբիոնից հայտարարելով, որ Սերժ Սարգսյանը Արցախի հարցը մտցրել է փակուղի և ընդհանրապես՝ պրոցեսները կարգավորման մասով գնում են խիստ ոչ հայանպաստ հունով: Փաշինյանը պնդում էր, որ Սերժ Սարգսյանը ժողովրդի թիկունքի հետևում է կարգավորում Արցախի հարցը` հանրությանը չտեղեկացնելով, թե իրականում ինչ է բանակցում և ինչ հարցեր են դրված բանակացությունների սեղանին:

Այս ամենից կարելի է ենթադրել, որ Ռուբեն Ռուբինյանի տրամաբանությամբ` Նիկոլ Փաշինյանը իշխանության գալու համար Արցախի հարցը շահարկելով հանցագործություն է գործել պետության և քաղաքացիների հանդեպ: Կա՛մ 2018-ից հետո փոխվել են Ռուբեն Ռուբինյանի հանցագործության ձևակերպման և դրա բովանդակության մասին պատկերացումները, կա՛մ վերջինս, ըստ էության, հանցագործության մասին հաղորդում է տալիս՝ Նիկոլ Փաշինյանին մեղադրելով պետության դեմ հանցագործություն գործելու մեջ....