ՔՊ-ական քաղաքապետերը հանուն նոր պաշտոնի միմյանց «պատերազմ» են հայտարարել

Քաղաքական իշխանությունը ցանկանում է իրենով անել նաեւ Հայաստանի համայնքների միությունը։ Բանն այն է, որ միության ղեկավարի՝ Էմին Երիցյանի պաշտոնավարման ժամկետը լրանում է, ու իշխող «Քաղաքացիական պայմանագիրը» փորձում է իրենով անել նաև այս կառույցը:  Ինչպես և պահանջում են ժանրի կանոնները՝ ՔՊ-ականների միջև բավական լուրջ մրցակցություն է ի հայտ եկել այս պաշտոնը զբաղեցնելու հարցում: Դիցուք՝ երեք հիմնական հավակնորդները, անշուշտ, ՔՊ-ական քաղաքապետերն են՝ էջմիածնի քաղաքապետ Դիանա Գասպարյանը, Արտաշատի քաղաքապետ Կառլեն Մկրտչյանը և Արմավիրի քաղաքապետ Դավիթ Խուդաթյանը:

Երեկ՝ մայիսի 24-ին, միության ընդհանուր ժողովին «ՔՊ-ական համայնքապետերը մասնակցելու էին եկել, որպեսզի իրենց ցանկալի թեկնածուին ընտրեին որպես միության նախագահ, բայց, ըստ միության գործող կանոնադրության, ՔՊ-ական որեւէ թեկնածու չի համապատասխանում կառույցի նախագահի համար առաջադրված չափանիշներին։ Սակայն, ինչպես ասում են՝ երբ է դա խանգարել ՔՊ-ականներին :

Հիմնական հավակնորդը, ըստ մամուլի, Դիանա Գասպարյանն է, սակայն Մկրտչյանն ու Խուդաթյանը, կարծես թե, չեն պատրաստվում մնալ լոկ դիտորդի դերում և իզուր չէ, որ ժամկետների խախտմամբ ու ուշացումով, կանոնադրության մեջ փոփոխություններ անելու առաջարկներով հենց Արտաշատի ու Արմավիրի քաղաքապետերն են հանդես եկել։ Առաջարկը, սակայն, չի անցել, և միության ղեկավարի ընտրությունը հետաձգվել է: Խուդաթյանը և Մկրտչյանը, ի դեպ, իրենց մարզերի թիվ մեկ պաշտոնը՝ մարզպետի աթոռը թափուր մնալուն պես հայտ էին ներկայացնում անգամ այս բարձր դիրքին, սակայն այդպես էլ դրան չհասան, Փաշինյանը նախընտերց Արարատի և Արմավիրի մարզերում այլ մարդկանց նշանակել: Այսօր երկու ՔՊ-ականները, իսկ նրանց հետ նաև Դիանա Գասպարյանը, փորձում են ամեն գնով, ինչպես տեսանք` չխորշելով անգամ ժամկետ և կանոնադրություն խախտելուց, ձեռք գցել արդեն այս՝ համայնքների միության ղեկավարի պաշտոնին, ինչը, իհարկե, հավելյալ լծակներ և իշխանություն կտա այն ՔՊ-ականին, ով կընտրվի այս պաշտոնում...