ՔՊ-ական պատգամավորների ամբիցիաները վե՞ր են Փաշինյանի որոշումներից

Վերլուծական 27 Մայիս, 2022 22:21

Մամուլը այսօր գրել էր, որ Սյունիքի մարզպետ Ռոբերտ Ղուկասյանի եւ մարզից ընտրված ՔՊ-ական 5 պատգամավորների միջեւ կապը չի ստացվում։ Պատգամավորները չեն հաշտվում Փաշինյանի որոշման հետ, որ մարզպետի պաշտոնին կարգել է իր խորհրդականին, որը ՔՊ-ական չէ։

Ինչպես երևում է Սյունիքից ընտրված ՔՊ-ական պատգամավորները որոշել են կոալիցիա կազմել ընդդեմ Ղուկասյանի, իսկ դա իր հերթին նշանակում է ընդդիմանալ ոչ թե Ղուկասյանին, այլ նրան նշանակող Նիկոլ Փաշինյանի կամքին և քաղաքական որոշմանը: Փաստացի քաղաքական պայքարը տարատեսակ լծակների համար ՔՊ ներսում այնքան է սրվել, որ բանը հասել է անգամ Փաշինյանի նշանակած կադրերի ոտքի տակ փորելուն: Վերը նշված խորհրդարանականների կոալիցիան, ըստ էության, ղեկավարում է Սյունիքի նախկին մարզպետ Արմեն Խաչատրյանը, ով չի հաշտվել մարզպետի պաշտոնը կորցնելու մտքի հետ:

Նրա հարաբերությունները այնքան էլ հարթ չէին Սյունիքի նախորդ ՔՊ-ական մարզպետների հետ և արդյունքում Փաշինյանը փոխարինեց նրանցից վերջինին՝ Մելիքսեթ Պողոսյանին ոչ ՔՊ-ական Կալավանցի Ռոբերտ Ղուկասյանով, սակայն այստեղ էլ ՔՊ-ականները համաձայն չեն, քանի որ Ղուկասյանը որոշել է վարել ինքնուրույն քաղաքականություն և չի համաձայնեցնում իր որոշումները սյունեցի պատգամավորների հետ: Արդյունքում էականորեն տուժում է մարզը: Սյունիքի հարցերով միջգերատեսչական աշխատանքային խմբի ֆինանսավորման հարցն օդում կախված է:

Փաստորեն, Սյունիքից ընտրված պատգամավորների համար սեփական ամբիցիաները շատ ավելի կարևոր են , քան այն մարզի խնդիրների լուծումը, որտեղից որ պատգամավոր են ընտրվել...