Նիկոլ Փաշինյանը շարունակում է «մաքրել» Արսեն Թորոսյանին

ՀՀ գլխավոր դատախազության պետական շահերի պաշտպանության վարչությունում ՀՀ Էկոնոմիկայի նախարարությունից և ՀՀ հաշվեքննիչ պալատից ստացված փաստաթղթերի հիման վրա ուսումնասիրվել է COVID-19 համավարակով պայմանավորված՝ մեկուսացված անձանց կեցության ապահովման և սննդի մատուցման գործընթացի՝ օրենսդրության պահանջներին համապատասխան իրականացման ոլորտը: Արդյունքում` պարզվել է, որ 26 միլիոն չարաշահումների մեջ հիմնական մեղավորները հյուրանոցներն են և էկոնոմիկայի նախարարության ստորին և միջին օղակի պաշտոնյաները, ՀՀ էկոնոմիկայի նախարարության պատասխանատու պաշտոնատար անձինք, ծառայության նկատմամբ անբարեխիղճ կամ անփույթ վերաբերմունքի հետևանքով, առանց ներկայացված տվյալների արժանահավատությունը ստուգելու ուղղությամբ միջոցներ ձեռնարկելու, հարկային հաշիվներն ու հաշիվ վավերագրերն ընդունել են՝ անզգուշությամբ պետության համար առաջացնելով ծանր հետևանքներ:

Հիշեցնենք, որ հաշվեքննիչ պալատը հաշվեքննություն է իրականացրել Առողջապահության նախարարությունում, եւ ուսումնասիրվել է նոր կորոնավիրուսային համավարակով պայմանավորված բյուջետային ծախսերի իրականացումը: Մասնավորապես, ուսումնասիրեվել է 2020թ. հունվարի 1-ից մինչեւ 2020թ. դեկտեմբերի 31-ը ընկած ժամանակահատվածը, երբ առողջապահական ոլորտը ղեկավարում էր Արսեն Թորոսյանը: Ըստ ՀՊ-ի՝ COVID-19-ի կանխարգելման, վերահսկման եւ բուժման աշխատանքների պլանավորման գործընթացը, ինչպես նաեւ ֆինանսավորման մեխանիզմները նպատակային արդյունավետ չեն եղել: Նախարարի 23.07.2020թ. թիվ 2410-Լ հրամանի համաձայն՝ հաստատվել է CՕVID-19 ախտորոշման և բուժման նպատակով պետական բյուջեից պահպանման ծախսերով փոխհատուցում ստացող ԲԿ-ների (բաժանմունքների) ցանկը։ Հրամանի համաձայն՝ ծախսերի փոխհատուցումը իրականացվել է փաստացի կատարված ծախսերի համապատասխան։ Հաշվեքննությամբ արձանագրվել է, որ աշխատավարձ /ներառյալ վարչական/ ընդհանուր վարձատրություն և պարգևատրում ծախսային ուղղությամբ արձանագրվել են խեղաթյուրումներ, որոնք հանգեցրել են փաստացի կատարվածից ավելի փոխհատուցման։

Ստացվում է, որ պատկան կառույցները, հաշվեքննիչ պալատի այս եզրակացությունը ուսումնասիրելով, հանգել են եզրակացության, որ համավարակի ընթացքում կատարված չարաշահումները սահմանափակվում են հյուրանոցներով և էկոնոմիկայի նախարարության միջին օղակի մի շարք աշխատակիցներով, իսկ դիցուք՝ առողջապահության նախարար Արսեն Թորոսյանը որևէ խախտում թույլ չի տվել, կամ ասենք այսպես՝ իր ղեկավարած կառույցը որևէ չարաշահման մեջ թաթախված չի եղել: Ակնհայտ է, որ Նիկոլ Փաշինյանը հերթական անգամ փորձում է մաքրել Արսեն Թորոսյանին՝ ջրելով հետհեղափոխական Հայաստանի թերևս ամենախոշոր կոռուպցիոն պատմություններից մեկը: Սա, ի դեպ, առաջին դեպքը չէ, երբ Փաշինյանը փրկության ձեռք է մեկնում Թորոսյանին. հիշեցնենք, որ, ըստ մամուլի, Թորոսյանի անվան հետ կապված ևս մեկ ամղկահարույց գործ կար, սակայն Փաշինյանը թույլ չի տվել վերջինիս դեմ քրեական գործ հարուցել: ԱԱԾ-ն, իհարկե, այս լուրը հերքել է, սակայն ինչպես ասում են՝ չի լինում ծուխ, առանց կրակի...