Հարյուրավոր միլիոններ մեր գրպանից՝ ՔՊ-ականների «թռչելու» համար

Իշխանական պատգամավորների մոտ զբոսաշրջային սեզոնը փոքր-ինչ վաղաժամ է բացվել: Բանն այն է, որ հայրենի երեսփոխանները անձնվիրաբար նետվել են արտասահմանյան վոյաժների հորձանուտը. չկա այդպիսի շաբաթ, որ ՔՊ-ականները չմեկնեն Եվրոպա  կամ Ասիա: Պաշտոնական տեղեկատվության համաձայն` վերջիններս մեկնում են աշխատանքային գործուղումների, թե ինչ է շահում նրանց գործուղումներից ԱԺ-ն և Հայաստանի Հանրապետությունը՝ դժվար չէ կռահել:

ՀՀ Ազգային ժողովի (ԱԺ) նախագահի տեղակալ, ԱԺ նախագահի պաշտոնակատարի պարտականությունները կատարած Ռուբեն Ռուբինյանը 2022թ. մարտի 23-ին ստորագրել է Կ-68-Ա կարգադրությունը՝ մարտի 28-ից ապրիլի 1-ը Բրյուսել՝ Բելգիայի Թագավորություն պատվիրակություն գործուղելու մասին: «Եվրոպական խորհրդարանի պատգամավորների և պաշտոնյաների հետ աշխատանքային հանդիպումներ ունենալու նպատակով 2022 թ. մարտի 28-ից ապրիլի 1-ը Բրյուսել (Բելգիայի Թագավորություն) գործուղել Ազգային ժողովի եվրոպական ինտեգրման հարցերի մշտական հանձնաժողովի նախագահ Արման Եղոյանին, «Քաղաքացիական պայմանագիր» խմբակցության ղեկավար Հայկ Կոնջորյանին և Ազգային ժողովի պատգամավոր Արուսյակ Ջուլհակյանին»,- գրված է կարգադրության մեջ: Այս կարգադրության մեջ մեր ուշադրությունը գրավեց մի հետաքրքիր հանգամանք. ԱԺ 3 հոգուց կազմված պատվիրակությունը մեկնել է Բրյուսել (համենայնդեպս, կարգադրությունը հենց Բրյուսել մեկնելու մասին է), բայց, չգիտես ինչու, Արման Եղոյանի ճանապարհածախսը ավելի երկար երթուղի է ընդգրկում՝ Երևան-Բրյուսել-Մոնակո:

Ապրիլին գործուղումներ են եղել Փարիզ, Վաշինգտոն, Ստրասբուրգ, Բելգրադ, Սանկտ Պետերբուրգ։ Անվտանգության թեմաներով համաժողովին մասնակցելու համար ապրիլի 25-28-ը Ժնև են գործուղվել ԱԺ պաշտպանության հարցերի հանձնաժողովի նախագահ Անդրանիկ Քոչարյանն ու նրա օգնական Էմմա Սարգսյանը, Սարգիս Խանդանյանը, Արթուր Հովհաննիսյանը։ Ամենաուշագրավը՝ նաև պաշտպանության հանձնաժողովի փորձագետ Արծրուն Հովհաննիսյանը, ևս երկու փորձագետ:

Մայիսի 5-ին ստորագրված կարգադրության համաձայն՝ Ավստրիայի մայրաքաղաք էին մեկնել ՔՊ-ական պատգամավորներ Գեւորգ Պապոյանը, Արուսյակ Մանավազյանը, Միքայել Թումասյանը: Օրինակ՝ մայիսի 26-28-ը Նիկոսիա (Կիպրոսի Հանրապետություն) էին մեկնել ԱԺ ՔՊ-ական պատգամավորներ Էդուարդ Աղաջանյանը, Մարիա Կարապետյանը, Հռիփսիմե Գրիգորյանն ու Սարգիս Խանդանյանը։ Հունիսի 6-9-ը Բեռն (Շվեյցարիայի Համադաշնություն) կմեկնեն Էդուարդ Աղաջանյանը, Հերիքնազ Տիգրանյանը եւ Քոչարյան Անդրանիկը։

Իսկ այժմ մի պարզ հեմամատական: Ահա թե ինչով են ԱԺ-ում ինչով են աչքի ընկել վոյաժների սիրահար պատգամավորներից մի քանիսը: Դիցուք՝ Էդուարդ Աղաջանյանը բացակայել է 91 անգամ, ունեցել է ընդամենը 3 ելույթ: Արման Եղոյանը բացակայել է 30 անգամ, ունեցել 1 ելույթ: Արուսյակ Ջուլհակյանը բացակայել է 60 անգամ. ունեցել 6 ելույթ: Հայկ Կոնջորյանը բացակայել է 34 անգամ. ունեցել 5 ելութ: Հերիքնազ Տիգրանյանը բացակայել է 25 անգամ, ունեցել 3 ելույթ: Արուսյակ Մանավազյանը բացակայել է 4 անգամ, ունեցել 0 ելույթ: Գրիգորյան Հռիփսիմեն բացակայել է 42 անգամ, ունեցել 1 ելույթ: Սարգիս Խանդանյանը բացակայել է 84 անգամ, ունեցել 2 ելույթ:

Ինչպես տեսնում ենք` սույն պատգամավորները ակտիվությամբ, մեղմ ասած, աչքի չեն ընկնում անգամ ԱԺ-ում, ուր մնաց հարցեր լուծեին արտասահմանյան գործուղումների ժամանակ: Միևնույն ժամանակ, այս փաստը նրանց չի խանգարում ամիսը մեկ կամ երկու անգամ հարկատուների հաշվին մեկնել հանգստի. այլ կերպ հաշվի առնելով նրանց գործուղումների ՕԳԳ-ն և արդյունքները այդ վոյաժները չես անվանի...