«Քրեական ենթամշակույթի» դեմ պայքարող ՔՊ-ականների հույսը քրեական հեղինակություննե՞րն են

Վերլուծական 31 Մայիս, 2022 20:34

«Քրեական ենթամշակույթի» դեմ պայքարող ՔՊ-ականների հույսը քրեական հեղինակություննե՞րն են

Ընդդիմադիր Նիկոլ Փաշինյանը հաճախ էր ՀՀԿ-ին մեղադրում այսպես կոչված` քրեածին տարրերի, կիսաքրեական աշխարհի հետ սերտ կապերի, այդ կապերը քաղաքական դաշտ բերելու մեջ: Հեղափոխությունից հետո էլ Փաշինյանն ու թիմը հուժկու պայքար սկսեցին քրեական ենթամշակույթի դեմ՝ խոստանալով այն արմատախիլ անել հայաստանյան իրականությունից: Դեռ 2019-ին վարչապետ Նիկոլ Փաշինյանը խորհրդարանի ամբիոնից շատ կոշտ ձևակերպումներ էր արել, թե Հայաստանում քրեական ենթամշակույթի քարոզչությունը և հերոսացումը պետք է արմատախիլ արվեն, քանի որ դրանք կոռուպցիայի ամենամեծ ուղեկիցն են: «Եվ եթե կան մարդիկ, այդ թվում՝ քաղաքական գործիչներ, պատգամավորներ, որոնք մտածում են, թե այս հարցում կոմպրոմիսներ են լինելու, հանկարծ մտքներով չանցնի՝ կպառկացնենք ասֆալտին և կտանք պատերով բառիս բուն իմաստով: Որևէ մեկը չփորձի, նախկին կլնի, ներկա կլնի, թող ականջներին օղ անեն, եթե օղ չեն անի, էդ տեսարանները դուք կտեսնեք իրականության մեջ», — հայտարարել էր պետության ղեկավարը:

Սակայն, եթե դիցուք՝ կալանավայրերում այդ պայքարը քիչ թե շատ նշմարվում է, նույնը չենք կարող ասել քաղաքական դաշտի մասին։ Այստեղ հակառակն է՝ ՔՊ-ն և քրեական հեղինակությունները սերտորեն համագործակցում են:

Դիցուք՝ Նիկոլ Փաշինյանի միանձնյա որոշմամբ Վանաձոր քաղաքի ժամանակավոր ղեկավար նշանակված Փելեշյանը պաշտոնավարման 4 տարիներին երբևէ հարցազրույցներ չի տվել, ելույթներ չի ունեցել, փոխարենը՝ հանրությանը հայտնի է Վանաձորի տարբեր հատվածներում ծավալած բիզնեսներով ու քրեական անցյալով։ «Ակա» մականունով Արկադի Փելեշյանը, ըստ Դատական տեղեկատվական համակարգի, դեռ 14 տարի առաջ դատապարտվել է խուլիգանության համար։ 2016-ին էլ հոգևորականի էր ծեծել՝ ընտրություններում իրեն չաջակցելու համար. այս գործը դատարան չհասավ՝ կողմերը հաշտվեցին։

Մամուլը գրել էր, որ ՏԻՄ ընտրություններին ընդառաջ՝ Շիրակի մարզում ձայների ապահովման հիմնական բեռը ՔՊ-ն դրել էր Գյումրիում հայտնի քրեական հեղինակություն Օդոնի (Գառնիկ Խաչատրյանի) վրա։ Այս քրեական հեղինակությունը ևս իր մարդիկ ուներ իշխանական ցուցակում։ Մասնավորապես ցուցակի կարևոր դիրքերն էին զբաղեցնում Օդոնի հորաքրոջ որդին՝ Գագիկ Թաթարյանը, և քենորդին Նիկոլայ Ղազարյանը՝ ում հայրն էլ Գյումրիում հայտնի է Գիա մականունով։

Վեդիում Գարիկ Սարգսյանի հաղթանակը նույնպես առանց քրեական հեղինակությունների օգնության չէր: Մամուլը գրել էր, որ իշխանությունները ամեն ձև փորձել են ճնշում բանեցնել տեղի քրեական հեղինակություն Գագիկ Հակոբյանի վրա, քանի որ վերջինս չէր համաձայնվում աջակցել Սարգսյանին: Նա այդ տեսակետը նաև հայտնել էր իր հրապարակային ելույթում: Դրանից հետո հայտնի դարձավ, որ «Վեդի ալկո» գործարանի տարածքում Հակոբյանին ծեծի են ենթարկվել: Ընդ որում, ինչպես հայտնի դարձավ հետո, «Վեդի ալկո» գործարանի տարածքից ոստիկանական բաժին բերման են ենթարկել միմիայն ծեծվողին՝ «Վեդեցի Գոջին»: Դրանից հետո Հակոբյանը մտափոխել և քաղաքական հաշվեհարդարին հետևել է «Հանրապետության» հայտարարությունը՝ ինքնաբացարկ հայտնելու մասին:

Գրեթե նույն իրավիճակն էր Թալինում: Սակայն այստեղ քրեական հեղինակություն Ռուստամ Ստեփանյանի՝ Չաղ Ռուստամի ճնշումների արդյունքում զիջած Կարեն Գրիգորյանի մեկ ձայնի շնորհիվ քաղաքապետ ընտրված Տավրոս Սափեյանը չկարողացավ օրենքով սահմանված կարգով ստանձնել համայնքի ղեկավարի լիազորությունները և Թալինում նոր ընտրություններ են սպասվում:

ԱԱԾ պահեստազորի սպաների միություն ՀԿ-ն հայտարարություն է տարածել՝ նշելով,որ ՔՊ-ական պատգամավոր Արեն Մկրտչյանը իր հանդիպումներն անցկացնում է «Աթոռիկ» ռեստորանում, օրերս կալանքից ազատված քրեական հեղինակության «բարձր» ներկայությամբ, ով ճաղերի այս կողմից լույսը տեսնելու բերկրանքը զգացել է շնորհիվ իր հովանավոր նույն Արեն Մկրտչյանի։ Բոլոր հրավիրյալները անցնում են նրանց քաղուսուցման դասընթացները, ստանում քրեաքաղաքական անհրաժեշտ հրահանգավորումներ, մեթոդական ցուցումներ։ Ռեստորանի «թանկագին» այցելուների համար սնունդն ու խմիչքն անվճար է` ըստ պահանջի։ Ծառայության մատուցման համար ռեստորանն ազատված է հսկիչ-դրամարկղային կտրոններով սպասարկելու հոգսից։

Մամուլը գրել էր նաև, որ Արագածոտնի արդեն նախկին Արագածոտնի դուխով մարզպետ Դավիթ Գևորգյանը դիմում էր ոմն Արագածավանի Ծյոմին, որ իր հարցերը լուծի:

Ինչպես տեսնում ենք՝ քրեական ենթամշակույթի դեմ ծավալած պայքարը ՔՊ-ականների մոտ քաղաքական դաշտի վրա չի տարածվում և չնայած այն հանգամանքին, որ լինելով ընդդիմադիր` նրանք մի մարդու պես մերժում էին այդ արատավոր բարքերը, այսօր հենց իրենք են այդ բարքերը բերում քաղաքական դաշտ և սերտացնում կապերը քրեական և կիսաքրեական աշխարհի ներկայացուցիչների հետ` նրանց դիտարկելով իբրև կայուն հենարան...