Նիկոլ Փաշինյանը շարունակում է հակասել ինքն իրեն

2018-ի համեմատ Հայաստանում աշխատավարձի ֆոնդի ընդհանուր ծավալն աճել է 61.3 մլրդ դրամով կամ 65 տոկոսով։ Այս մասին Ազգային ժողովում մայիսի 31-ին 2021 թ. պետական ​​բյուջեի կատարողականի նախնական քննարկման ժամանակ ասաց ՀՀ վարչապետ Նիկոլ Փաշինյանը։

Ընդ որում, ինչպես նշեց վարչապետը, միջին ամսական աշխատավարձը 2018-ին կազմել է մոտ 174 հազար դրամ, իսկ 2021-ին՝ 234 հազար դրամ։ «Այսպիսով, Հայաստանում միջին ամսական աշխատավարձի աճը կազմել է 34.4 տոկոս կամ 60 հազար դրամ»,- ասաց կառավարության ղեկավարը։

Այս ամենը, իհարկե, շատ ոգևորիչ է հնչում, սակայն որոշակի հարցեր են ի հայտ գալիս այն պարզ պատճառով, որ 2021 թվականի դեկտեմբերին Փաշինյանի միջին աշխատավարձի ամբողջովին այլ թվեր էր նշում, այն է՝ 277 հազար դրամ: «Էական աճ է արձանագրել նաև միջին ամսական աշխատավարձը: 2021 թ.-ի դեկտեմբերին միջին աշխատավարձը եղել է 277 661 դրամ»- հայտարարել էր 2021 թվականի վերջում Փաշինյանը: Վիճակագրական կոմիտեն էլ իր հերթին հայտարարություն էր տարածել, որ 2021թ.-ին Հայաստանում միջին ամսական անվանական աշխատավարձը կազմել է 204,048 դրամ: Այսինքն` մի կողմից Փաշինյանն ինքը այլ թիվ է նշել, մյուս կողմից` վիճակագրական կոմիտեն ընդհանրապես մեկ այլ թիվ է նշել, այսօր էլ վարչապետը երրորդ թիվն է նշում, որը անհասկանալի է, թե որտեղից  է ի հայտ եկել, երբ տարին արդեն ամփոփված է:

Ինչպես հասկանում ենք՝ ոչինչ չենք հասկանում, իսկ կառավարությունը և վիճակագրական կոմիտեն շարունակում են միմյանց հակասող թվեր հրամցնել տնտեսական բումի սպասումով շուրջ չորս տարի ապրող հպարտ քաղաքացիներին...