Որքան վնաս է պատճառել պետությանը Դիլիջանի ՔՊ-ական «արու» քաղաքապետը

Դիլիջանի համայնքապետ Դավիթ Սարգսյանը բավականին ոչ միանշանակ պատմության կիզակետում է հայտնվել: Մամուլը ահազանգում է, որ Սարգսյանը որոշումներ է ընդունել, որով համայնքի հողերը շուկայականից ցածր գներով օտարել է Երեւանի բնակիչների, երբ Դիլիջանի շատ բնակիչներ տուն կառուցելու համար հողամաս չունեն։ Դիլիջանի համայնքապետարանի ինտերնետային կայքը տեղեկացնում է, որ 2022թ․ ապրիլի 18-ին Դ․ Սարգսյանը որոշում ընդունել է քաղաքացի Սուրեն Մանուկյանին աճուրդային կարգով հողամաս օտարելու մասին։ Դիլիջան համայնքի ղեկավարի 2022թ. մարտի 18-ի թիվ 149-Ա որոշմամբ 2022թ. ապրիլի 18-ին աճուրդի է ներկայացվել Դիլիջան համայնքի սեփականությունը հանդիսացող «Բնակավայրերի հողերից» 690.9քմ հողամաս, Դիլիջանի Սարալանջի փողոցի թիվ 40/2 հասցեում բնակելի տան կառուցման նպատակով, 4836300 դրամ մեկնարկային գնով, աճուրդում 4836300 դրամ առավելագույն գնով հաղթել է Երեւանի Կոմիտասի 7/2 շենքի բնակիչ Սուրեն Մանուկյանը, այդ մասին հողամասերն աճուրդային կարգով օտարող հանձնաժողովի կողմից կազմվել է արձանագրություն: 

Մայիսի 5-ին Դիլիջան համայնքի ավագանին, միաձայն, 18 կողմով որոշել է համաձայնություն տալ Դիլիջան համայնքի սեփականությունը հանդիսացող «Գյուղատնտնտեսական նշանակության հողերից» 48049.7քմ մակերեսով թվով 6 հողամասերը, «Բնակավայրերի հողերից» 1169.2քմ ընդհանուր մակերեսով թվով 4 հողամասերը աճուրդի միջոցով օտարելու մասին համայնքի ղեկավարի առաջարկությանը և հաստատել մեկնարկային գները։ Եվ կրկին աճուրդային վաճառքի ներկայցված մեկնարկային գները շուկայականից ցածր են։ Օրինակ՝ «Բնակավայրերի հողերից» Կալինինի փողոցում գտնվող հասարակական կառուցապատման համար նախատեսված 360 քմ հողամասի աճուրդ-վաճառքի մեկնարկային գին է սահմանված 2 միլիոն 520 հազար դրամը, Օրձոնիկիձեի փողոցի 376 քմ հողամասի մեկնարկային գին՝ 2 միլիոն 632 հազար դրամը եւ այլն։

Այսինքն` ստացվում է, որ Դիլիջանի համայնքապետը անում է մի բան, ինչի համար քրեական գործեր են հարուցվել մի շարք ոչ ՔՊ-ական և նախկին համայնքապետերի դեմ, նրանցից ոմանք նույնիսկ կալանավորվել են: Իսկ ՔՊ-ական համայնքապետին թույլատրվում է օրը ցերեկով խախտել օրենք, պետությանը դրանով պատճառել վնաս և մնալ անպատիժ: Հետաքրքիր է, որ վերը նշվածը ապացուցող բոլոր փաստաթղթերը առկա են համայնքապետարանի պաշտոնական կայքում, սակայն պատկան մարմինները զլացել են կամ պարզապես չեն ցանկացել ծանոթանալ դրանց և անել համապատասխան հետևություններ: