ՔՊ-ական պատգամավորներին կարելի է այն, ինչի համար «քարկոծվում» էին ՀՀԿ-ականները

Ազգային ժողովի մշտական հանձնաժողովների համատեղ նիստում շարունակվում է 2021 թվականի պետական բյուջեի կատարողականի քննարկումը։ Սոցալական ոլորտի ծախսերը քննարկվում են կիսադատարկ դահլիճում։ Նիստին, բացի հանձնաժողովի նախագահներից, մասնակցում է իշխանական ընդամենը չորս պատգամավոր։ Ընդգծենք, որ նիստին ամբողջ կազմով ներկա չեն աշխատանքի և սոցիալական հարցերի ու ֆինանսավարկային և բյուջետային հարցերի հանձնաժողովների պատգամավորները։

Ահա տվյալ հանձնաժողովի կազմը`

Ժամանակին, երբ Նիկոլ Փաշինյանը ընդդիմադիր պատգամավոր էր, նա բավական ծանր էր տանում ՀՀԿ-ական պատգամավորների և պաշտոնյաների նման անպատասխանատու վարքագիծը:

Փաշինյանը, մասնավորապես, հոխորտում էր, երբ ԱԺ չէր ներկայացել այն ժամանակվա Երևանի քաղաքապետ Տարոն Մարգարյանը, ընդդիմադիր Փաշինյանը հարց էր ուղղում՝ արդյո՞ք ՀՀԿ-ական քաղաքապետը ունի ավելի կարևոր գործեր, պահանջում էր վերջինիս պատժել և ստիպել ավելի պատասխանատու կերպով վերաբերվել իր զբաղեցրած պաշտոնին: 

ՀՀԿ-ական բացակա պատգամավորներին էլ Փաշինյանը անվանում էր ժողովրդի հաշվին ապրող ձրիակերներ: Զավեշտալի է, սակայն, այսօր նույնը, ինչում Փաշինյանը մեղադրում էր ՀՀԿ-ականներին, անում են իր թիմակիցները: Հետաքրքիր է՝ Փաշինյանը կկիրառի՞ յուրայինների հանդեպ այն բոլոր պատիժները, որոնք առաջարկում էր կիրառել ՀՀԿ-ականների դեպքում...