Արեն Մկրտչյանի նախընտրական PR-ը` կոռուպցիոն սկանդալների մեջ հայտնված գործարարի հաշվին

Այսօր ԱԺ նիստի ընթացքում ՔՊ-ական պատգամավոր Արեն Մկրտչյանը հայտարարեց, որ Ալավերդիում ադամանդի գործարան կառուցելու նպատակով պետական գույք պետք է օտարվի: Մկրտչյանի հետաքրքրությունը Ալավերդիով պատահական չէ. նա, ըստ մամուլի հրապարակումների և նաև իր ֆեյսբուքյան էջի ակտիվության, Ալավերդու քաղաքապետի ՔՊ թեկնածուն է լինելու գալիք ՏԻՄ ընտրություններում, հետևաբար ալավերդցիների սիրտը շահելու համար Մկրտչյանը պատրաստ է ցանկացած գին վճարել այս պահին:

Գինը, ի դեպ, բավականին մեծ է. բանն այն է, որ ադամանդի գործարանը կառուցելու է գործարար Արտակ Բաղիկյանը: Այդ մասին իր ֆեյսբուքյան էջում գրել էր ինքը` Արեն Մկրտչյանը:

Իր հերթին` Արտակ Բաղիկյանի անունը մամուլը կապում էր հայտնի կոռուպցիոն սկանդալի հետ: «ArmLur.am-ին  մանրամասներ էին հայտնի դարձել ԱԱԾ-ի դեպքի բացահայտումից, թե ովքեր են կաշառք տվել էկոնոմիկայի նախարարության պաշտոնյային, և ինչպես է ՀՀ վարչապետը անձամբ ներկա գտնվել ըստ նախաքննական մարմնի կաշառք տված գործարարների ադամանդի գործարանի բացմանը: 

ԱԱԾ-ի կողմից ձերբակալված պաշտոնյան ՀՀ էկոնոմիկայի նախարարության լիցենզավորման և թույլտվությունների վարչության պետ Արմեն Նալբանդյանն է, որը, ըստ նախաքննական մարմնի, հանդիսանալով պաշտոնատար անձ, իրավասու լինելով տնտեսվարող սուբյեկտների կողմից ապրանքների ներկրման դեպքում ստուգում իրականացնելուց հետո տրամադրելու պետական վերահսկողական ակտ, ակնհայտ ապօրինի գործողություն կատարելու, այն է՝ տնտեսվարող կազմակերպության կողմից ներկրած ադամանդյա քարերի իրական արժեքը թաքցնելու, մաքսազերծման ժամանակ քիչ մաքսատուրք վճարելու, պետական վերահսկողական ակտի տրամադրման նպատակով համապատասխան ստուգում չիրականացնելու և այդ պայմաններում հիշյալ ակտը տրամադրելու դիմաց 2020 թվականի սեպտեմբերի 6-ին անձամբ ընկերության սեփականատերերից ստացել է խոշոր չափերի կաշառք: Իսկ ովքեր են Էկոնոմիկայի նախարարության պաշտոնյային կաշառք տված ՀՀ-ում գործունեություն իրականացնող տնտեսվարող ընկերության փաստացի սեփականատերերը: Նույն աղբյուրի  տեղեկությունների համաձայն՝ վերջիններս գործարարներ Արմեն և Արտակ Բաղիկյաններն են, որոնք զբաղվում են ադամանդագործությամբ:

Արտակ Բաղիկյանի անունը շոշափվում էր նաև Hetq.am-ի՝ «Ինչպես և ով է ադամանդ ներկրել Հայաստան՝ կեղծելով արժեքն ու խուսափելով մաքսատուրքերից» վերտառությամբ հոդվածում:

Այժմ բավական պիկանտ իրավիճակ է ստացվում: Փաստորեն, պետությունը հող է օտարում ադամանդի գործարանի բացմանը մի ընկերությանը, որը, ըստ մամուլի, թաթախված է տարատեսակ կոռուպցիոն գործարքների մեջ: Ինքը` Բաղիկյանը, նշենք, որ այս հանգամանքը հերքել է և պնդել, որ ընկերությունը աշխատում է բացառապես օրինական դաշտում: Այնուամենայնիվ, Արեն Մկրտչյանին և կառավարությանը անգամ շշուկները չեն կանգնեցնել և սա այն դեպքն է, երբ երկուստեք ձեռնտու գործարք է տեղի ունենում: Գործարարները պետության աջակցությամբ կընդլայնեն բիզնեսը, իսկ Արեն Մկրտչյանը իր նախընտրական արշավը կիրականացնի նրանց աջակցությամբ` փորձելով շահել ալավերդցիների սիրտը ՏԻՄ ընտրություններին ընդառաջ: