Հաստատված է՝ Compass band-ի տղաները կներկայացնեն Հայաստանը (տեսանյութ)

Սեպտեմբերի վերջին Հայաստանում կայացած մանկական Եվրատեսիլի եզրափակիչ փուլում հաղթեց Compass տղաների խումբը՝ «Sweetie baby» երգով:
Սակայն օրեր անց «Մանկական Եվրատեսիլ» -ի շուրջ ծավալվեցին քննարկումները, ըստ որոնց գուցե հաղթած Compass խումբը չմասնակցի Ամստերդամում կայանալիք մրցույթին, քանի որ տղաներից մեկի տարիքը չի համապատասխանում եվրատեսիլյան օրենքներին:
Գոհար Գասպարյանը, ով հանդիսանում է «Մանկական Եվրատեսիլ 2012» մրցույթի հայաստանյան նախագծի պատասխանատուն, հայտնել է, որ Ժնեւում Եվրոպական հեռարձակողների միության սպորտային ամենամյա համաժողով գործուղման ընթացքում տեղեկացա “Մանկական Եվրատեսիլ 2012”-ի Հայաստանյան եզրափակիչ փուլի հաղթող “Compass band”-ի վերաբերյալ շրջանառվող լուրերի մասին, ըստ որի խմբի անդամներից մեկի տարիքը չի համապատասխանում մրցույթի մասնակիցներին ներկայացվող պահանջներին:

Ամստերդամում կայանալիք “Մանկական Եվրատեսիլ 2012”-ի երգի մրցույթում իրավունք ունեն մասնակցելու 10-ից 15 տարեկան երեխաները: Մրցույթի Հայաստանյան նախընտրական փուլին հայտ ներկայացրած “Compass band-ի կազմը բաղկացած է 4 հոգուց. 13-ամյա Դավիթ Պարոնիկյանը, 13-ամյա Արշավիր Գրիգորյանը, 13-ամյա Արամ Ծատուրյանը եւ 13-ամյա Աբրահամ Ազնաուրյանը: Հայաստանի հանրային հեռուստաընկերության “Մանկական Եվրատեսիլ”-ի հանձնաժողովի նախնական լսումների արդյունքում “Compass band”-ի “Sweetie baby” երգն անցել է մրցույթի եզրափակիչ փուլ:
Մրցույթի եզրափակիչ փուլում “Compass band”-ի պրոդյուսեր Զառա Պետրոսյանի նախաձեռնությամբ խմբի ելույթի բեմականացման համար որպես շեյքերահար խմբի կազմի հետ ելույթ է ունեցել Միքայել Վարոսյանը, որի 10 տարին, ինչպես հետագայում պարզվել է, պետք է լրանա միայն 2013 թվականի հուլիս ամսին:

Նկատի ունենալով, որ ինչպես մեծերի, այնպես էլ փոքրերի Եվրատեսիլի ներպետական նախընտրական փուլերում հանդիպում են տարիքային եւ այլ անհամապատասխանություններ' խնդրի մասին տեղեկացրել ենք Մանկական Եվրատեսիլի ղեկավար Սիտցե Բեքերին: Վերջինս նշել է, որ Հայաստանյանի եզրափակիչ փուլի հաղթող Compass band-ի հիմնական կազմն իր Sweetie baby երգով համապատասխանում է մրցույթի կանոններին եւ կարող է մասնակցել Ամստերդամում կայանալիք «Մանկական Եվրատեսիլ 2012»-ի երգի մրցույթին, իսկ Միքայել Վարոսյանի մասնակցության հարցը կքննարկվի վերահսկող խմբի ժողովում»: