Արսեն Թորոսյանը մտերիմ ընկերոջ օգնությամբ կրկին «գրոհո՞ւմ» է քաղաքապետարանը

Գլխավոր դատախազությունը տեղեկացնում է, որ պետական շահերի պաշտպանության վարչությունում ՀՀ պետական վերահսկողության ծառայությունից «Շտապբուժօգնություն» ՓԲ ընկերությունից ստացված փաստաթղթերի հիման վրա իրականացվել է ուսումնասիրություն, որի արդյունքում ի հայտ են բերվել առերևույթ հանցավոր արարքների հատկանիշներ պարունակող տվյալներ: 2019-2021թթ.-ին պայմանագրային հիմքով  13 տնտեսվարողներին մատուցված ծառայությունների համար վճարված 9.503 կանչերի, ինչպես նաև քաղաքացիներին վճարովի հիմունքներով մատուցված այլ ծառայությունների համար վճարված 22.612 կանչերի ուսումնասիրության արդյունքում հայտնաբերվել է 2005 դեպք, երբ «Շտապբուժօգնություն» ՓԲԸ-ի իրավասու պաշտոնատար անձանց կողմից ծառայության նկատմամբ անփույթ կամ անբարեխիղճ վերաբերմունքի հետևանքով՝ ծառայողական փաստաթուղթ հանդիսացող կանչի թերթիկները ճիշտ չեն լրացվել: Մասնավորապես՝  արդեն իսկ վճարված կանչերի համար թերթիկները կրկնակի մուտքագրվել են «Արմեդ» համակարգ՝ իբր պետպատվերի շրջանակներում իրականացվող ծառայություն: Դրա հիման վրա ՀՀ ԱՆ պետական առողջապահական գործակալությունն ընկերությանը վճարել է լրացուցիչ ընդհանուր 23.267.750 ՀՀ դրամ գումար: 

Ուշագրավն այն է, որ այս բացահայտումը տեղի ունեցավ այն բանից հետո, երբ ՊՎԾ պետի տեղակալ նշանակվեց Արա Եղոյանը, ով, ի դեպ, համարվում է առողջապահության նախկին նախարար Արսեն Թորոսյանի մտերիմ ընկերը և Եղոյանի պատասխանատվության տիրույթում հենց առողջապահության ոլորտն է: Ինքը` Արսեն Թորոսյանը, ըստ մամուլի տեղեկությունների, վաղուց է ցանկանում ազատվել Շտապբուժօգնություն ՓԲԸ-ի տնօրեն Թագուհի Ստեփանյանից և նրան փոխարինել իր յուրայինով:  

Նա ոչ միայն նախարարությունում մնացած իր կադրերին է կառավարում, այլև Երևանի քաղաքապետի փոխվելուց հետո սկսել է Երևանի առողջապահական համակարգը տնօրինել: Մամուլը գրել էր այն մասին, որ նա մտադիր է փոխել Երևանի առողջապահության վարչության պետին և իր մարդուն դնել: Իսկ այնուհետև  տեղեկություն տարածվեց, որ մտադիր է փոխել նաև Երևանի քաղաքապետարանի ենթակայությամբ գործող «Շտապբուժօգնություն» ՓԲԸ տնօրեն Թագուհի Ստեփանյանին և իր «մարդուն» նշանակել այս պաշտոնին։ Նախկին նախարարը, իհարկե, որևէ լիազորություն չունի քաղաքապետարանի ենթակայությամբ գործող կառույցներում կադրային փոփոխություններ իրականացնելու, բայց բանից պարզվում է՝ նա կարողանում է կարդային հարցեր լուծել քաղաքապետարանում և իր ուզած մարդկանց ազատել կամ նշանակել այս կամ այն պաշտոնին։ Ինչևէ, Արսեն Թորոսյանի մտերիմ ընկերոջ ղեկավարած կառույցի այս բացահայտումը էականորեն մեծացնում է նախկին նախարարի շանսերն ազատվել Ստեփանյանից և այդ բաղձալի պաշտոնը հանձնել իր յուրայիններից մեկին...