Քանդել մինչև վերջ. «կոկորդիլոսագետ» Գարիկ Սարգսյանի «ռեֆորմները» հասան Վեդի

Նախընտրական շրջանում Սարգսյանը դիմել էր ՔՊ-ի և ՔՊ-ականների թերևս ամենասիրելի և փորձված տարբերակին` պոպուլիզմին, խոստանալով վեդեցիներին համայնքը կարճ ժամանակ անց դրախտի վերածել։ Սարգսյանն ընտրություններից մոտ մեկ ամիս առաջ բարեգործության օրեր է հայտարարել, նա գրեթե ամեն օր մոտ երկու տասնյակ որոշում է ստորագրել՝ համայնքի բնակիչներին դրամական օգնություն տրամադրելու մասին։ Այդ օգնությունները 10-50 հազար դրամի միջակայքում էին, իր հայրենի Նոր Կյանքի ու հարևան Ոսկետափի անապահով ընտանիքներին 20-35 հազարական դրամ է տրամադրել։ Տարբեր հաշվարկներով, նախընտրակակ արշավի ընթացքում սոցիալական աջակցության անվան տակ 5-6 մլն դրամի փող է դուրս գրվել համայնքային բյուջեից։ Ընտրություններում հաղթելուց հետո Սարգսյանը, իհարկե, մոռացել է վեդեցիների սոցիալական խնդիրների մասին։

 

Փոխարենը` երկրորդ փորձից Վեդի խոշորացված համայնքի ղեկավար դարձած կոկորդիլոսագետ Գարիկ Սարգսյանը եկած-չեկած համայնքապետարանի աշխատակազմում կադրային ջարդ է սկսել։ Ըստ մամուլի, փոփոխությունների հեղինակը Վեդի բժշկական կենտրոնի տնօրեն, ՔՊ-ից ավագանու անդամ Արամայիս Գրիգորյանն է։ Հենց նրա նախաձեռնությամբ են ազատվում աշխատանքից։

 

Բացի այդ, Սարգսյանը նոր որոշումներ է ստորագրել և խոշորացված համայնքի կազմում ընդգրկված 16 համայնքների նոր ղեկավարներ է նշանակել։ Մասնավորապես՝ համայնքի ղեկավարներ են նշանակվել Նոր Կյանք, Այգավան, Լուսաշող, Սիսավան Վանաշեն, Գոռավան, Եղեգնավան , Տափերական, Փոքր Վեդի, Շաղափ, Գինեվետ, Դաշտաքար, Ուրցաձոր , Ոսկետափ, Նոր Ուղի, Լանջանիստ համայնքներում: Այս որոշումներով Գարիկ Սարգսյանը միևնույն ժամանակ ազատվել է դեկտեմբերի 5-ի ՏԻՄ ընտրություններում իրեն պարտության մատնած համայնքի ղեկավարներից:

 

Արդյունքում՝ վեդեցիները, ինչպես և ժամանակին Գարիկ Սարգսյանի ղեկավարության տակ ապրող Արարատի մարզի բնակիչները, մնացել են իրենք իրենց հույսին և ապրում են «եղունգ ունես` գլուխդ քորի» սկզբունքով, քանի որ այլևս պարզ է, որ Սարգսյանի նախընտրական ճոխ խոստումները ոչ այլ ինչ էին, քան դասական պոպուլիզմ, որն էլ այսօր ջրի երես է դուրս գալիս...