Պաշտոն՝ ամեն գնով. ՔՊ-ականների «աթոռակռիվը» հասավ Սիսիան

Օրերս «Հայանտառ» ՊՈԱԿ-ի «Սիսիանի անտառտնտեսություն» մասնաճյուղի տնօրեն է նշանակվել Տիգրան Համբարձումյանը, որը ՔՊ-ական սիսիանցի պատգամավոր Կարեն Համբարձումյանի հարազատ եղբայրն է։ Համբարձումյանի այս քայլը, ի դեպ, ունի տրամաբանական բացատրություն, քանի որ Սիսիանում ՔՊ-ի դիրքերը թույլ են, եւ աշնանը սպասվող քաղաքապետի ընտրություններից առաջ հարկավոր է ամրապնդել դիրքերը, ինչով էլ կզբաղվի իր եղբայրը։ Մեկ օրում ազատել են նախկին պետին, նույն օրն էլ նշանակել պատգամավորի եղբորը և սա, իհարկե, հեղափոխական իշխանությունների ոգով է: Քանի որ Համբարձումյանի եղբոր նշանակումը անցել է առանց տարատեսակ էքսցեսների, կարելի է ենթադրել, որ իշխանությունները ունեն որոշակի կոնսենսուս, որ Սիսիանում համայնքապետի թեկնածուն կլինի հենց պատգամավորը: Քանի որ վերջինիս Սյունիքի մարզպետ դառնալու ամբիցիաները Փաշինյանը հրաժարվել էր բավարարել, չի բացառվում, որ այստեղ առնվազն Համբարձումյանին ընդառաջեն:

Մամուլը վերջերս գրել էր, որ «Քաղպայմանագրի» Սիսիանի կառույցում երկու թեւի են բաժանվել եւ, կարելի է ասել, պատերազմում են իրար դեմ: Մի թեւը համակարգում է Առուշ Առուշանյանի դեմ ցուցմունքներ հավաքագրող Ներսես Խաչատրյանը, ակտիվ կուսակցական Արսեն Ավագյանը եւ ուղնուծուծով այլ ՔՊ-ականներ: Մյուս թեւը՝ նախկինների ճամբարից հեռացած Կարեն Համբարձումյանը՝ իր թիմով: Կարեն Համբարձումյանը, օրինակ, վերջերս հորդորել է իր բարեկամ, քաղաքապետի ժամանակավոր պաշտոնակատար Արմեն Հակոբջանյանին ազատել Արսեն Ավագյանի ազգականներին, որոնք աշխատում են համայնքային ենթակայության հիմնարկներում:

Մայիսի 6-ին «Ազատ Սիսիանցիներ» ֆեյսբուքյան էջը տեղեկություն էր տարածել, որ Ազգային անվտանգության  ծառայության աշխատակիցները Սիսիանի համայնքապետարանում են, եւ կան բերման ենթարկվածներ։  Ըստ մեր աղբյուրների` բերման են ենթարկվել քաղաքաշինության եւ տնտեսության ոլորտը համակարգող եւ կազմակերպման բաժինների պետերը, նաեւ համայնքապետարանի իրավախորհրդատուն։ Ըստ Սիսիանում շրջանառվող լուրերի՝ բերման ենթարկված  քաղաքաշինության եւ տնտեսության ոլորտը համակարգող բաժնի պետ Սիմոն Հովհաննիսյանը այս տարվա աշնանը կայանալիք  Սիսիանի ավագանու համամասնական ընտրություններում գլխավորելու է ընդդիմության միասնական ցուցակը և հենց դա թույլ չտալու համար Կարեն Համբարձումյանի բարեկամ համայնքապետը գործի էր անցել՝ ազատվելով պոտենցիալ մրցակիցներից:

Մյուս կողմից` Համբարձումյանը միակ մարդը չէ, ով Սյունիքում որոշակի հավակնություններ ունի: Կապանի ընտրություններում պարտված, այնուհետև կրկին Սյունիքի մարզպետի հավակնորդների շարք ներառված պատգամավոր Դավիթ Դանիելյանը այս օրերին բավական ակտիվ է Սյունիքում, իսկ սա ենթադրում է, որ վերջինս դեռ չի կորցրել համայնքապետ դառնալու իր հույսը, հատկապես, որ Սիսիանը, ինչպես ասում են, քիփլիկ գյուղ չէ, այլ բավականին մեծ քաղաք է: Հետևաբար առկա երկու թևերին, կարծես թե, միացել է նաև Դավիթ Դանիելյանը, հատկապես, որ նա, ըստ մամուլի բազմաթիվ հրապարակումների, մտերիմ է Տիգրան Ավինյանի հետ և վերջինս մեկ անգամ չէ, որ զբաղվել է Դանիելյանի լոբբինգով: 

Ինչպես տեսնում ենք՝ հերթական անգամ համայնքապետի աթոռը զբաղեցնելու ցանկությունը պառակտում է մտցնում հեղափոխականների շարքերում և ստիպում նրանց դուրս գալ միմյանց դեմ` մոռանալով հեղափոխական սոլիդարության մասին: Իշխանությունը, թերևս, քաղցր բան է...