Տիգրան Ավինյանի և ՔՊ-ի հույսը նախկին կարկառուն ՀՀԿ-ականներ են

Նոր Նորք վարչական շրջանի ղեկավար Սուրեն Ղամբարյանը ֆեյսբուքյան գրառում է արել, որում տեղեկացնում է, որ վաղվանից դադարեցնում է լիազորությունները։ Մամուլում տեղեկություններ են հայտնվել, որ այս պաշտոնում ՔՊ-ն ցանկանում է նշանակել նախկին ՀՀԿ-ական, գործարար Գուրգեն Պողոսյանին: Կայքերից մեկը, ի դեպ, գրել էր, որ նա ժամանակին լծված էր ՀՀԿ-ի համար ձայներ բերելու գործընթացին:

Պողոսյանը վերջերս մամուլում տրված իր հարցազրույցներից մեկում շեշտել էր, որ Հանրապետական կուսակցությունից դուրս է եկել 2017-ին՝ իր դիմումի համաձայն: Պատճառը ՀՀԿ-ի կադրային քաղաքականությունն էր, որը նա տվյալ պահին համարում էր ոչ ճիշտ: Ի դեպ, հետագայում այդ սխալը խոստովանեցին նաև կուսակցության ղեկավարները, ինչն էլ Պողոսյանը համարել և այսօր էլ համարում է քաղաքական բարձր մշակույթի աննախադեպ դրսևորում: Ինչ վերաբերում է ՔՊ-ի օգտին իր ծավալած աշխատանքին, Պողոսյանը պատասխանել է, որ այո, նա, անգամ չլինելով ՔՊ-ի շարքային անդամ, ուժերի ներածին չափով փորձել է սատարել լրջագույն արտաքին և ներքին մարտահրավերների պայմաններում երկրի կառավարման ղեկը ստանձնած քաղաքական ուժի դիրքերի ամրապնդմանը՝ անկախ անձերից ու կարգախոսներից: Ըստ էության, նա չի հերքել, որ վերջին համապետական ընտրություններին օգնել է ՔՊ-ին՝ բնականաբար իր կապերով և ռեսուրսներով, հեղինակությամբ, որը գուցե և ՔՊ-ականները չորս տարվա մեջ չեն հաջողացրել ստեղծել անգամ թաղային մակարդակում:

Կադրային փոփոխությունները կախված են Երևանի ավագանու սպասվելիք ընտրությունների հետո, որոնք, ամենայն հավանականությամբ, տեղի կունենան հաջորդ տարի։ Եվ իշխանությունը, իր դիրքերն ամրապնդելու համար որոշում է կայացրել փոխել մի քանի համայնքապետերի։ Գուրգեն Պողոսյանը այս առումով բավական ընդունելի ֆիգուր է ՔՊ-ի համար: Նա Սերժ Սարգսյանի ժամանակ ղեկավարել է Նորքի 9-րդ զանգվածի ՀՀԿ նախընտրական շտաբը, Տարոն Մարգարյանի աներձագ Ռոբերտ Սարգսյանի մերձավորն է։ Երևանի քաղաքապետի գալիք ընտրություններում նախկին ՀՀԿ-ականի փորձառությունը, իհարկե, ՔՊ-ին չի խանգարի: Դե իսկ նախկին ՀՀԿ-ականները, փաստորեն, հեղափոխությունից հետո վերադառնում են իշխանություն, սակայն արդեն ՔՊ-ի դեմքով: