Գյումրիի շուրջ կրքերը բորբոքվում են. Նազելի Բաղդասարյանը նոր «պլա՞ն» ունի

Շիրակի մարզպետ Նազելի Բաղդասարյանն երեկ Գյումրու քաղաքապետարանում խորհրդակցություն է անցկացրել մարզային ու քաղաքային իշխանությունների ներկայացուցիչների մասնակցությամբ։ Նա տեղեկացրել է, որ այս տարի պետական բյուջեով 14 միլիարդ դրամի ծրագիր է նախատեսվում իրականացնել Գյումրի քաղաքում։ Մարզպետն անդրադարձել է սուբվենցիոն ծրագրերի թերացումներին ու ձգձգումներին, նաև՝ Գյումրու նախկին քաղաքապետ Վարդան Ղուկասյանի օրոք քաղաքի կենտրոնական զբոսայգու որոշ հատվածների օտարման խնդրին։ Սուբվենցիոն ծրագրերի չհիմնավորված ծախսերի խնդրով Շիրակի մարզպետը նույնիսկ դիմել է դատախազություն

Երեկվա հանդիպումներից և Բաղդասարյանի շեշտադրումներից հետո պարզ է դառնում, որ մարզպետը ակնհայտորեն ձգտում է ազատվել Գյումրու ընտրված համայնքապետից և ինչու ոչ նրան փոխարինել ՔՊ-ականով: Զավեշտը այս իրավիճակի կայանում է նրանում, որ ՔՊ-ականները չորս տարի ղեկավարելով մարզը նոր են նկատում քաղաքում առկա խնդիրները, իսկ մյուս էլ ավելի մեծ զավեշտը կայանում է նրանում, որ այն բացերը որոնց մատնացույց է անում Բաղդասարյանը առկա են իր ղեկավարած մարզի մասշտաբներով նույնպես: Դիցուք՝  2021թ. դեկտեմբերի 23-ի դրությամբ ՀՀ Շիրակի մարզի համայնքների բյուջեների սեփական եկամուտները կատարվել են 75.6%-ով, նախատեսված 3,422,161.9 հազ դրամ սեփական եկամուտներից ընդամենը հավաքվել է 2,588,756.9 հազ. դրամ: Սեփական եկամուտների թերակատարումը կազմում է 833,405.0 հազ. դրամ: Մարզում 24 համայնք չի ապահովել եկամուտների կատարման մարզի միջին ցուցանիշը։ Խոշորացված համայնքներից ամենացածր ցուցանիշը գրանցվել է Մարմաշենում՝ 31.4%։ Քաղաքային համայնքներում բարձր է ի դեպ հենց Գյումրու արդյունքը՝ 84.4%: Արթիկում սեփական եկամուտները հավաքվել են 86.8%-ով:

Միկրոավտոբուսների հարցը, որ այդպես էլ չի լուծվում Գյումրիում առկա է ողջ մարզում, սակայն, չգիտես ինչու մյուս քաղաքների տրանսպորտային ցանցի արդիականացումից մարզպետը չի դժգոհում: Ինչ՞ է արել ինքը Բաղդասարյանը որպես մարզպետ, որպեսզի այս խնդիրը դադարի լինել համամարզային խնդիր:

Ինչ վերաբերվում է ակնարկին, որ Գյումրիի քաղաքապետը լոյալ է նախկինների հանդեպ, ապա ինչ ասես այն հանգամանքի մասին, որ Շիրակի փոխմարզպետ  է նշանակվել Կարեն Մանուկյանը, Շիրակի մարզում առավել շատ ճանաչում են որպես գեներալ Աշոտ Գիզիրյանի  հետ մտերիմ անձ։ Գիզիրյանն իր հերթին նախկինում զբաղեցրել է Շիրակի մարզպետի պաշտոնը և լքել է այն 2013 թվականին:  Մանուկյանը երկար տարիներ աշխատել է պետական համակարգում, զբաղեցրել է նաև Շիրակի մաքսատան պետի պաշտոնը, 2013  թվականի հունվարի 18-ին պետական կառավարման համակարգում արդյունավետ աշխատանքի համար պարգևատրվել  նախագահ Սերժ Սարգսյանի կողմից «Անանիա Շիրակացի» մեդալով։ Պակաս նախկի՞ն է, իհարկե ոչ: Գյումրի քաղաքում չի կարող լինել մականունավոր, ով ապօրինություններ կիրականացնի, այսպես է ասում Բաղդասարյանը, սակայն, եթե նա անկեղծ և սկզբունքային է, ապա պետք է իր կուսակցության առջև հարց դնի, թե ինչպես մականունավորը, ով նախկինում մեղադրվում էր ապօրինությունների մեջ հանկարծ դարձավ մեկ այլ քաղաքի՝ Վանաձորի համայնքապետ: Լոռին է, իհարկե, Շիրակը չէ, սակայն, վստահ ենք, որ Նազելի Բաղդասարյանի սկզբունքայնությունը Շիրակի մարզով չի սահմանափակվում և նա այդ հարցը կտա իր քաղաքական ղեկավարությանը...

Ըստ էության, եթե Բաղդասարյանը և ՔՊ-ն որոշել են ազատվել Գյումրի քաղաքապետից, ապա պետք է հեռանա նաև ինքը Բաղդասարյանը և բազմաթիվ այլ ՔՊ-ական պաշտոնյաներ, քանի որ նրանք էլ անում են նույնը, ինչ որ մեղսագրվում է Վարդգես Սամսոնյանին...: