Երկու թիմակիցներից ո՞ւմ «ժերտվա կտա» Փաշինյանը

Գլխավոր դատախազության պետական շահերի պաշտպանության վարչությունում Էկոնոմիկայի նախարարությունից և Հաշվեքննիչ պալատից ստացված փաստաթղթերի հիման վրա ուսումնասիրվել է Covid-19 համավարակով պայմանավորված՝ մեկուսացված անձանց կեցության ապահովման և սննդի մատուցման գործընթացի՝ օրենսդրության պահանջներին համապատասխան իրականացման ոլորտը: Քանի որ ումնասիրությամբ ի հայտ են բերվել առերևույթ հանցագործության հատկանիշների առկայությունը մատնանշող բավարար տվյալներ՝ ՀՀ գլխավոր դատախազության պետական շահերի պաշտպանության վարչությունում Քրեական օրենսգրքի 178-րդ հոդվածի 1-ին մասի (3 դրվագ), 2-րդ մասի 2-րդ կետի (5 դրվագ), 3-րդ մասի 1-ին կետի (1 դրվագ), 325-րդ հոդվածի 1-ին մասի (9 դրվագ) և 315-րդ հոդվածի 2-րդ մասի (1 դրվագ) հատկանիշներով հարուցվել է քրեական գործ:

Երեկ կառավարության նիստից հետո էկոնոմիկայի նախարար Վահան Քերոբյանը հայտարարեց, որ եթե քննությունը պարզի իր մեղավորությունը, ապա ինքը պատրաստ է կրել պատասխանատվություն, այդ թվում՝ քաղաքական, իսկ սա ենթադրում է հրաժարական: Ճիշտ է մեկ անգամ չէ, որ Քերոբյանը հավաստիացրել է, որ այս կամ այն դեպքում հրաժարական կներկայցնի և այնուհետև հայտարարել , որ ընդամենը կատակ էր անում:

Այս անգամ սակայն կատակ անել չի ստացվի, քրեական գործ է հարուցվել և հասկանալով պահի լրջությունը` էկոնոմիկայի նախարարը ոչ ավել, ոչ պակաս փորձում է մեղավորության և պատասխանատվության սլաքները իր վրայից թեքել դեպի առողջապահության նախարարությունը և նախարար Անահիտ Ավանեսյանը: «Պայմանագրերը ստորագրվել են մինչ իմ նախարար դառնալը։ Որոշ ժամանակ անց այս գործառույթը փոխանցվել է առողջապահության նախարարությանը»,- հայտարարել է Քերոբյանը։  Այս հայտարարությունը իր հերթին նշանակում է, որ քննչական մարմինները պետք է ուշադրություն դարձնեն նաև առողջապահության նախարարության կողմից կատարված քայլերի վրա: Այսինքն՝ քրեական գործը հարուցվելուն պես ՔՊ-ականներն սկսեցին միմյանց մեղադրելու գործընթացը, և յուրաքանչյուրը փորձում է ջրից չոր դուրս գալ:

Երկու պաշտոնյայի համար ստեղծված, մեղմ ասած, անհարմար իրավիճակում առավել ուշագրավ է այն, թե ինչպես իրեն կդրսևորի վարչապետ Նիկոլ Փաշինյանը: Մամուլը բավական երկար ժամանակ է, ինչ գրում է, որ Փաշինյանը կառավարությունում որոշակի վերադասավորումներ է ցանկանում անել և առաջին հերթին ցանկանում է ազատվել հենց առողջապահության և էկոնոմիկայի նախարարներից` հաշվի առնելով, որ նրանք նախանձելի պարբերությամբ են հայտնվում այնպիսի ռեզոնանսային պատմությունների կիզակետում, որոնք ստվերում են նաև Փաշինյանի վարկանիշը: Բնական է, որ այստեղ Նիկոլ Փաշինյանն առաջին հերթին մտածում է իրեն մաքրելու մասին, հետևաբար վաղ թե ուշ կարգելու է մեղավորների և պատասխանատուների, մնում է հասկանալ՝ թիմակիցներից ո՞ւմ ժերտվա կտա Նիկոլ Փաշինյանը...