Մուկուչյանի լոյալության «գինը» կբարձրացվի. ինչի՞ է պատրաստվում Նիկոլ Փաշինյանը

Կենտրոնական ընտրական հանձնաժողովի անդամների վարձատրության չափերը կփոփոխվեն: Համապատասխան փոփոխությունն ամրագրված է «Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքում լրացումներ եւ փոփոխություններ կատարելու մասին նախագծում, որը կազմում է Ընտրական օրենսգրքի մասը եւ ներկայացված է խորհրդարանին: Սա նշանակում է, որ նախագծի ընդունման արդյունքում ԿԸՀ նախագահ Տիգրան Մուկուչյանը կստանա 925 հազար 960 դրամ աշխատավարձ, իսկ նրա տեղակալն էլ՝ 793 հազար 638 հազար դրամ աշխատավարձ: ԿԸՀ անդամն ու Հաշվեքննիչ պալատի անդամն էլ կստանան 661 հազար 400 դրամ աշխատավարձ:

2018 թվականի մարտին, երբ Տիգրան Մուկուչյանը Սերժ Սարգսյանի ձեռքից ստացավ Հայրենիքին մատուցած ծառայությունների համար իր մեդալը, ընդդիմադիրները կատակում էին, որ Մուկուչյանին վաստակավոր նկարչի մեդալ է շնորհվել: Դժվար չէ հիշել նաև այն, թե ինչ էպիտետներով էր ընդդիմադիր Նիկոլ Փաշինյանը բնութագրում Մուկուչյանին և ինչպես էր վերջինիս մեղադրում ընտրակեղծարարությունների մեջ:

Այժմ պարզվում է` Մուկուչյանը այնքան լավ է աշխատում, որ կարելի է բարձրացնել նրա աշխատվարձը: Իսկ արդյո՞ք իշխանությունների այս քայլը կապված չէ նրա հետ, որ մոտ ապագայում կարող է մեծանալ ՔՊ-ի համար ԿԸՀ նախագահի դերը: Դիցուք՝ սպասվում են բավականին բարդ ՏԻՄ ընտրություններ, այդ թվում Երևանի քաղաքապետի ընտրությունները: Չի բացառվում, որ տեղի ունենան հանրաքվեներ, օրինակ՝ սահմանադրական փոփոխությունների կամ Արցախի հարցով: Եվ այս դեպքում նման քայլը ոչ այլ ինչ է, քան Մուկուչյանի լոյալության դիմաց ավելի բարձր գնի սահմանում...