Մարտին Գալստյանի «կշիռը» չի՞ բավարարում բանկերի և «չենջերի» ախորժակը զսպելու համար

Վերջին շաբաթների ընթացքում ԿԲ-ն հանկարծակի բացահայտեց, որ 2021 թվականի հոկտեմբերի 5-ից ի վեր տևական ժամանակ ՀՀ արտարժույթի շուկայում նկատվել են հակամրցակցային համաձայնության և գնային չարաշահման դրսևորումներ։ Պարզվել է՝ համաձայնեցված փոխարժեքները հրապարակվել են rate.am տեղեկատվական հարթակում, ինչն ազդել է այլ փոխանակման կետերի գնորոշման վարքագծի վրա՝ հանգեցնելով նշված արժույթների մասով ՀՀ դրամի նկատմամբ փոխարժեքի ոչ օրինաչափ շեղումների: Արձանագրված խախտումների առնչությամբ համապատասխան փոխանակման կետերի նկատմամբ կիրառվել են պատասխանատվության միջոցներ՝ նախազգուշացման, տուգանքի և լիցենզիայի գործողության ժամանակավոր կասեցման տեսքով։

Բացի այդ, ԿԲ նախագահը հայտարարել էր, որ բանկերի ղեկավարների հետ քննարկումներ են տեղի ունեցել քաղաքացիներին հուզող մի շարք մտահոգիչ հարցերը պարզաբանելու նպատակով: Թե ինչ է քննարկել բանկերի ղեկավարների հետ Մարտին Գալստյանը դժվար է ասել, սակայն օրը ցերեկով քաղաքացիներին թալանելու սուրբ ավանդույթը վերջիններիս կողմից դեռևս շարունակվում է: Վերջին օրերին ֆեյսբուք սոցիալական ցանցում ԿԲ-ն ամենաթեգվող կառույցն է բոլոր պետական հիմնարկներից, քանի որ քաղաքացիները փորձում են ստանալ իրենց հուզող հարցերի պատասխանները, կամ բարձրաձայնում են կատարվող ապօրինությունների մասին: Մի մասին բանկերը հրաժարվում են արտարժույթ վաճառել, մյուս մասի համար իրենց բանկերը միջնորդավճարներ են բարձրացրել, չնայած որ պայմանագրերում այլ սակագներ էին ֆիքսված, իսկ ժողովրդի լեզվով ասա՝ չենջերն էլ ընդհանրապես մատնված են անտերության և կամայական կուրսով են փոխանակում արտարժույթը, գերշահույթներ ապահովելով: Բնականաբար, տուժում է միայն շարքային քաղաքացին:

Փաստենք, որ չնայած այն հանգամանքին, որ Մարտին Գալստյանի կարծիքով ինքը լուծել է բանկերի և փոխանակման կետերի կամայականությունների խնդիրը, դա, մեղմ ասած, այդպես չէ և քաղաքացիների թալանը շարունակվում է: Ինչո՞ւմ է խնդիրը, միթե՞ ԿԲ նախագահի կշիռը չի բավարարում վերը նշված կառույցներին կարգի հրավիրելու և օրենքի շրջանակներում գործել պարտադրելու համար, այդ  դեպքում գուցե ժամանա՞կն է, որ Մարտին Գալստյանը պարզապես հրաժարական տա զբաղեցրած պաշտոնից, քանի որ, ինչպես հասկանում ենք, նա այդ պաշտոնում այնքան էլ ազդեցիկ և արդյունավետ չէ և նրա անատամ վարքագծի պատճառով օրը ցերեկով բանկերը և փոխանակման կետերը շարունակում են քաղաքացիների հաշվին գերշահույթներ ապահովել...