«Ռեֆորմիստ» մարզպետի անգործության 100 օրերը. սյունեցիները կրկին խաբվա՞ծ են

Վերլուծական 1 Հուլիս, 2022 20:42

100 օր առաջ վարչապետ Նիկոլ Փաշինյանի որոշմամբ կալավանցի Ռոբերտ Ղուկասյանը նշանակվեց Սյունիքի մարզպետ։ Ավելորդ է ասել, թե որքան խնդիրներ կան ծառացած սահմանամերձ այս մարզում և Ղուկասյանին ռեֆորմների մեծ սիրահար ներկայացնող Փաշինյանն ակնհայտորեն վերջինիս հետ լուրջ հույսեր էր կապում։ Հույսեր, որոնք, ինչպես հասկանում ենք, իրականություն չդարձան։

100 օրվա ընթացքում Սյունիքի մարզպետը առավելապես զբաղված էր ոչ թե մարզի խնդիրները կարգավորելով, այլ ներթիմային ռազբորկաներով։ Բանն այն է, որ այսպես ասած` քայլած ՔՊ-ականների սրտով չէր, որ մարզպետ է նշանակվել մեկը, ով հեղափոխության հետ որևէ կապ չուներ։ Արդյունքում` մի շարք պատգամավորներ, մասնավորապես` Դավիթ Դանիելյանը, Արմեն Խաչատրյանը, արշավ սկսեցին Ռոբերտ Ղուկասյանի դեմ, ինչին հակազդելով էլ զբաղված էր մարզպետը։

Իսկ մինչդ այդ, Սյունիքի մարզպետարանի պաշտոնական կայքից տեղեկանում ենք, թե ինչ հույժ կարևոր խնդիրների լուծմամբ էր զբաղված Ռոբերտ Ղուկասյանը։ Մարզպետը բազմաթիվ հանդիպումներ է ունեցել ԱՄՆ և ԵՄ երկրների դեսպանների հետ, նրա պնդմամբ` այդ հանդիպումները միտված են ներդրումներ խթանելուն, սակայն դեռևս անարդյունք, քանի որ ինչ-որ լուրջ ներդրումային ծրագրերի մասին դեռևս խոսք չի գնում։ Մնացած նորությունները առավելապես Սովետական Հայաստանի պատի թերթ են հիշեցնում` գնահատվեց վաստակաշատ ուսուցիչը, շնորհակալագիր հանձնվեց, մարզպետը շնորհավորեց, անցկացվեցին մրցումներ։

Սյունիքում ճանապարհների շինարարության հարցը, ըստ մարզպետի, ևս գտնվում է իր ամենօրյա ուշադրության կենտրոնում, բայց արի ու տես, որ արդեն մի քանի ամիս է` ճանապարհները քանդված են, բայց վերանորոգման աշխատանքներ չեն տարվում, մասնավորապես` Տաթև-Աղվանի ճանապարհահատվածում, իսկ Գորիս-Կապան ճանապարհը թշնամուն հանձնելուց հետո հենց Տաթև-Աղվանին է համարվում այլընտրանք: Փաստորեն, Ռոբերտ Ղուկասյանը այս հարցում ևս թերացել է, և ժամանակին չի արձանագել՝ ճանապարհի կառուցման գրաֆիկներից շեղվելուն:

Որևէ մեկի համար գաղտնիք չէ, որ Սյունիքի համար առաջնային լուծում պահանջող հարցերից մեկն էլ ջրի հարցն է: Մինչդեռ ժամերով, անգամ օրերով համայնքներում ջուր չի լինում, լինելիս էլ պղտոր է: Ընդ որում, մարզպետը տեղյակ է, որ խնդիրն ավելի սուր է Մեղրի խոշորացված համայնքում, որտեղ օրեր առաջ խնդիրը մանրամասն ուսումնասիրել է անձամբ, սակայն, ինչպես հասկանում ենք, լուծում այդ խնդրին նա չի գտել:

Արդյո՞ք կարող ենք ասել, որ Ղուկասյանը իսկապես արդարացրել է Նիկոլ Փաշինյանի սպասելիքները, եթե նրա պաշտոնավարումից 100 անց էլ կենսական խնդիրների լուծմանն ուղղված համակարգված աշխատանքի ականատես չենք լինում....