Նոր Հայաստանի «մինի-Սաշիկիները». պաշտոնյաների եղբայրները՝ արտոնյալ

Ընդդիմադիր Նիկոլ Փաշինյանը հաճախ էր շահարկում երրորդ նախագահ Սերժ Սարգսյանի եղբոր՝ Սաշիկ Սարգսյանի գործոնը, Հայաստանում անվանում եղբայրապետություն և մեղադրում ՀՀԿ-ին այդ եղբայրապետությանը տուրք տալու համար:

Ենթադրվում էր, որ հեղափոխությունը կոչված է վերացնելու այդ բարքերը, սակայն, արի ու տես, որ եղավ հակառակը` հեղափոխականները, կարծես թե, չդիմացան Սաշիկ Սարգսյանի փառքին և իրենք էլ նախընտրեցին իրենց եղբայրներին դարձնել արտոնյալ:

Դիցուք՝ մամուլը վերջերս գրել էր, որ իրենց տեղեկություններով  ՊՎԾ պետ Ռոմանոս Պետրոսյանի եղբայրը՝ Ռուբեն Պետրոսյանը, ով Կոտայքի ՋՕԸ-ի վերահսկողության պետի տեղակալն է, եւ ՋՕԸ-ի վերահսկողության պետ, ԱԺ «ՔՊ» խմբակցության ղեկավար Հայկ Կոնջորյանի եղբայրը՝ Ավետ Կոնջորյանը, աշխատանքի չեն գնում: Նրանք սկսել են բոյկոտել աշխատանքը, երբ նրանց չհաջողվեց ՋՕԸ-ում իրենց «մարդուն» տնօրեն կարգել։ Պլանները ձախողվելուց հետո նրանք որոշել են աշխատանքի չգնալ` հաշվի առնելով, որ երկուսի եղբայրներն էլ պաշտոնյաններ են, ուստի ինչ կուզեն՝ կանեն: 

Վերջերս էլ հայտնի է դարձել, որ Նիկոլ Փաշինյանի ավագ եղբայրը 2018-ի իշխանափոխությունից հետո Ռուսաստանից տեղափոխվել է Հայաստան ու դարձել միանգամից մի քանի բիզնեսի տնօրեն։ Իրավաբանական անձանց պետական ռեգիստրից տեղեկանում ենք, որ նախորդ տարվա ապրիլի 9-ին Արմեն Փաշինյանը դարձել է միանգամից երկու՝ «Գոու թրեյդ» և «Մինա-Մայա» ընկերությունների տնօրենը։

Օրերս «Հայանտառ» ՊՈԱԿ-ի «Սիսիանի անտառտնտեսություն» մասնաճյուղի տնօրեն է նշանակվել Տիգրան Համբարձումյանը, որը ՔՊ-ական սիսիանցի պատգամավոր Կարեն Համբարձումյանի հարազատ եղբայրն է։ Կրկին մամուլի տեղեկությունների համաձայն՝ մեկ օրում ազատել են նախկին պետին, նույն օրն էլ նշանակել պատգամավորի եղբորը։

«Զանգեզուր» կենսոլորտային հիմնարկի փոխտնօրեն, ՔՊ-ական Մարգար Մարգարյանը ծառայողական ավտոմեքենայով Կապանի զբոսայգում որոշել է շումախերություն անել։ Ականատեսները մեզ պատմեցին, որ պաշտոնյան ծառայողական ավտոմեքենայով՝ սեւ «Նիսան»-ով, զբոսայգում տեղադրված Հունան Ավետիսյանի արձանին հարակից աստիճաններով իջել է՝ քարուքանդ անելով աստիճաններն ու հարակից պատնեշը։ ՔՊ-ականներն ամեն ինչ արել են, որ միջադեպը կոծկվի, հատկապես՝ ՔՊ-ական պատգամավոր Դավիթ Դանիելյանը, ում սանիկն է Մարգար Մարգարյանը:

Փաշինյանի քավոր և Տավուշի մարզպետ Հայկ Ղալումյանի եղբայրը՝ Վահե Ղալումյանը, պատգամավոր է: Նրա անվան հետ որոշ թվով սկանդալներ են կապված: 2020 թվականին Երևանի քաղաքապետարանի կողմից հայտարարված բազմաբնակարան շենքերի շքամուտքերի վերանորոգման մրցույթը  շահած ընկերությունը բանկային կեղծ երեշխավորություն էր ներկայացրել։ Հետագայում պարզվել էր նաև, որ կեղծ փաստաթուղթ ներկայացրած ընկերությունը պատկանում է Վահագն Ղալումյանին, ով վարչապետ Փաշինյանի քավոր, Իջևանի քաղաքապետի ժամանակավոր պաշտոնակատար Հայկ Ղալումյանի մտերիմ ազգականն է։ Քաղաքապետի ժամանակավոր պաշտոնակատարը լրատվամիջոցներից մեկին հայտնել էր, որ նշված անձը իր հեռավոր ազգականն է և տարին մեկ անգամ հազիվ են հանդիպում։