Մոնոպոլիստ օլիգարխների դեմ պայքարող հեղափոխականների մոտ իրավիճակ է փոխվել

Ինչպես գիտենք` երեկ տեղի է ունեցել գործարար Սամվել Ալեքսանյանի դստեր հարսանեկան արարողությունը և ներկաների թվում էին թե՛ նախկին, թե՛ գործող պաշտոնյաներ: Նախկիններին, ինչպես ասում են, հարցեր չկան, նրանք Ալեքսանյանի հետ եղել են թիմակիցներ, կամ էլ մշտապես ունեցել են մտերիմ  հարաբերություններ, որոնք երբևէ չեն էլ թաքցրել: Իսկ օլիգարխի առիթին ներկա գործող պաշտոնյաներին, իհարկե, հարցեր առկա են, այն էլ՝ բավական մեծ թվով հարցեր:

Դիցուք՝ Սամվել Ալեքսանյանի ընտանեկան առիթին ներկա էին պատգամավոր Սիսակ Գաբրիելյանը, ՔՊ քաղաքապետի թեկնածու, 2018-ին Սամվել Ալեքսանյանի կողմից իր գլխավերևում պահված անձրևանոցի արժանացած Տիգրան Ավինյանը, փոխվարչապետ Մհեր Գրիգորյանը, էկոնոմիկայի նախարար Վահան Քերոբյանը:

Ընդամենը օրեր առաջ ՄՊՀ-ն իր զեկույցում նշեց, որ Սամվել Ալեքսանյանը գերիշխող դիրք ունի շուկաներից մեկում, սակայն իշխանությունները գործարարին օրենքի սահմաններում պատժելու փոխարեն որոշել են գնալ վերջինիս ընտանեկան առիթին: Եթե որևէ այլ երկրում էկոնոմիկայի նախարարին կամ փոխվարչապետին տեսնեին հայտնի օլիգարխի հետ մեկ տարածքում՝ կասկածից վեր է, որ այդ պաշտոնյան ընդամենը ժամերի ընթացքում հրաժարականի դիմում կներկայացներ, քանի որ հասարակության մոտ շատ տրամաբանական և ոչ պակաս տեղին հարցեր կծագեին: Սակայն, Հայաստանում նման հարցեր որևէ մեկի մոտ չեն ծագում, հետևաբար կարելի է օլիգարխի անունը փոխել դնել գործարար և «տժժալ»  վերջինիս ընտանեկան առիթին:

Վերջում, իշխանությունները հիշողությունը թարմացնելու նպատակով, հիշեցնենք, թե ժամանակին ինչպես էր խոսում Նիկոլ Փաշինյանը Սամվել Ալեքսանյանի մասին: