«Եղունգ ունես գլուխդ քորի». Հրաչյա Սարգսյանը «քցում» է երևանցիներին

Երևանի քաղաքապետի պաշտոնը ամիսներ առաջ ստանձնելիս Հրաչյա Սարգսյանը բավական առատաձեռն կերպով շռայլում էր տարատեսակ խոստումներ` հայտարարելով, որ երևանցիների խնդիրները մշտապես լինելու են իրենց ուշադրության կենտրոնում, 24 ժամյա ռեժիմով դրանց լուծում է տրվելու:

Անցան ամիսներ, երևանցիները բնականաբար բախվեցին խնդիրների, քանի որ ակնհայտ է՝ քաղաքային իշխանությունները իրենց տեղում չեն: Վերջերս դժգոհության ալիք էր բարձրացել, մասնավորապես, բազմաբնակարան շենքերի բնակիչների մոտ, ովքեր պնդում են, որ անտեսված են, խնդիրները միայն կուտակվում են: Սակայն, քաղաքապետարանից հայտարարում են, որ օրենքով բազմաբնակարան շենքը բնակիչների ընդհանուր սեփականություն է, հետևաբար նաև դրա պահպանումն ու շահագործումը բնակչի պարտավորությունն է: «Բոլոր տեսակի ծախսային մասերն իրականացնում են պատասխանատուները, բայց որպեսզի այդ աշխատանքները համակարգված լինեն, գոյություն ունեն համատիրություններ կամ լիազոր կառավարիչներ, որոնք բաժնային սեփականատերերի փոխարեն գործունեություն են իրականացնում»,-ասում է Երևանի քաղաքապետարանի կոմունալ տնտեսության վարչության պետ Արսեն Կարոյանը:

Պարզվում է՝ 24 ժամ երևանցիների խնդիրները լուծել պատրաստվող քաղաքապետն այժմ այդ խնդիրները իր գլխից ցրում է և գցում է համատիրությունների վրա` քաջ իմանալով, որ դրանք կամ նորմալ չեն աշխատում և չեն կատարում իրենց պարտականությունները, կամ էլ ընդհանրապես անգործության են մատնված: Ի դեպ, համատիրությունների նման ողբալի վիճակի մասին բազմիցս  է խոսվել ավագանու նիստերի ընթացքում, նույնիսկ օրենսդրական փոփոխություններ էին առաջարկում անել դրանց աշխատանքը հավուր պատշաճի կազմակերպելու նպատակով, բայց, արի ու տես, որ դեռ «ծնում» են այդ նախագիծը, իսկ երևանցիները շարունակում են ապրել անտերության մատնված և եղունգ ունես` գլուխդ քորի սկզբունքով...