ՔՊ-ական Դավիթ Դանիելյանի հովանավորյալի ՊՈԱԿ-ում իսկական «բեսպրեդել» է տիրում

Արդեն երկու օր է համացանցում բուռն կերպով քննարկվում է Զվարթնոց տաճարի տարածքում կազմակերպված խնջույքը, որը բազմաթիվ քննադատությունների առիթ հանդիսացավ: Բանն այն է, որ հուշարձանի տարածքից կազմակերպվել է հրավառություն, ինչը կարող էր լուրջ վնասներ հասցնել պատմամշակութային այս կոթողին։ ՀՀ ԿԳՄՍ նախարարության «Պահանության ծառայութուն» ՊՈԱԿ-ը «խոստովանում է», որ միջոցառման ընթացքում եղել է նախապես համաձայնեցված երաժշտության ժանրի և երգացանկի խախտում, որը անմիջապես շտկվել է։ Ակնհայտ է, որ միջոցառումն իր բնույթով չի համապատասխանել «Զվարթնոց» պատմամշակութային արգելոց-թանգարանի ոգուն։ 

Տարիներ առաջ, երբ Գառնիում նմանատիպ քեֆ-ուրախություն էր կազմակերպվել, այն ժամանակվա ընդդիմադիրները, ովքեր այսօր իշխանության գլուխ են՝ պահանջում էին քառատել մշակույթի նախարար Հասմիկ Պողոսյանին, ՊՈԱԿ-ի ղեկավարին: Ինչպես երևում է` այն ժամանակ ընդդիմադիրների սիրտը հայկական պատմամշակութային ժառանգության համար ավելի էր ցավում, քան այսօր: Այսօր, երբ ՊՈԱԿ-ի տնօրենի ԺՊ-ն յուրային է, նրան շատ բացերի վրա թույլ է տրվում աչք փակել: 

Մամուլը, ի դեպ, վերջերս գրել էր ՊՈԱԿ-ի տնօրենի ԺՊ-ի հերոսությունների մասին:  Նա, ըստ որոշ տեղեկությունների, հանդիսանում է ՔՊ-ական ատգամավոր Դավիթ Դանիելյանի հովանավորյալը: Բացի այս հրապարակումից, «Հետքի» տրամադրության տակ հայտնված փաստաթղթերի համաձայն, ՊՈԱԿ-ի տնօրենի պաշտոնակատար Արմեն Հովհաննիսյանը գնման պայմանագիր է կնքել քաղաքացի Ստեփան Իսպիրյանի  հետ, որն արգելոցի վարիչ Վահե Իսպիրյանի որդին է (ընկերության անվանումը ՊՈԱԿ-ն իր պատասխան-գրության մեջ նախընտրել է չհիշատակել)։ 4.2 մլն ՀՀ դրամով ՊՈԱԿ-ը ձեռք է բերել աուդիոգիդերի վարձակալության ծառայություն՝ ձեռնարկատիրոջը վճարելով ամսական 420 հազ. ՀՀ  դրամ։ Ամենապարզ մաթեմատիկական  հաշվարկով, 24 անգամ աուդիոգիդի ծառայությունից  օգտվելն արժեցել է 36․ 000 ՀՀ դրամ, իսկ մայիսին՝ 109 անգամ օգտվելու դիմաց վճարվել է 163․500 ՀՀ դրամ։ Այդ դեպքում ի՞նչ տրամաբանությամբ է ՊՈԱԿ-ն ամսական 420 հազ ՀՀ դրամ վճարում մի կազմակերպության, որի մատուցած ծառայությունը վարձավճարի 50 տոկոսն էլ չի ծածկում։ Եթե  ներկայացված թվերով ՊՈԱԿ-ն անուղղակի հաստատում է, որ աուդիոգիդի ծառայությունն առանձնակի պահանջարկ չի վայելում այցելուների շրջանում, ո՞րն է անհատ ձեռնարկատիրոջը յուրաքանչյուր ամիս 420 հազար դրամ վճարելու նպատակը։

Բնականաբար, այս հարցերը Դավիթ Դանիելյանի յուրայինին չեն տա, ստացվում է, որ այսօր նոր իշխանություններին թույլատրվում է անել այն, ինչի համար վերջիններս ընդդիմադիր եղած ժամանակ պահանջում էին պատժել ՀՀԿ-ականներին....