«Ճամբարափոխները»՝ երդվյալ ՔՊ-ական

Սեպտեմբերին կայանալիք ՏԻՄ ընտրություններից առաջ իշխանականները կրկին ակտիվ բանակցում են նախկին «տասովշչիկների» հետ, ակնկալում են նրանց օգնությունը, որ նախորդ աշնանը կայացած ՏԻՄ ընտրությունների պես խոշոր հաշվով չպարտվեն ընդդիմադիրներին։ Բացի տասովշիկներից, ՔՊ-ականների հույսը, իհարկե, նաև երկար տարի համայնքապետ աշխատած նախկիններ են, որոնց մերժելով ՔՊ-ն, ի դեպ, Թավշյա հեղափոխություն էր իրագործել 2018-ին:

Սակայն, մերժման փուլը, ինչպես երևում է, անցել է, և այժմ մերման փուլն է, նախկինները այնքան են մերվել նորերի հետ, որ արդեն մոռացել են իրենց կուսակցական պատկանելիությունը և այն, թե որ կուսակցության անունով էին ժամանակին երդվում: Դիցուք՝ Եղեգիսում ՔՊ ցուցակը գլխավորելու է նախկին ՀՀԿ-ական Արթուր Ստեփանյանը: Վերջինիս էլ մեղադրում էին համայնքի բնակիչներին սուտ խոստումներ տալու, առանց հանրային լսումների ՀԷԿ-ի կառուցման թույլտվություններ բաշխելու մեջ:

Մամուլում այն ժամանակ հայտնվում էին գյուղացիների հարցազրույցները, որոնք մեղադրում էին Արթուր Ստեփանյանին կեղծիքների մեջ: «Եղեգիս խոշորացված համայնքում մենք մեծամասնություն ենք կազմում՝ շուրջ 800 ընտրող։ Պահանջում ենք, որ համայնքապետ ընտրված Արթուր Ստեփանյանը չաշխատի, որովհետև ամեն ինչ հիմնված է կեղծիքների վրա։ Այդ կեղծիքները բացահայտ են, դրանք ներկայացված են ոստիկանությունում։ Թող Եղեգիսի համայնքապետ Արթուր Ստեփանյանը հրաժարական տա։ Նա ընտրվել է, բայց զուտ կեղծիքի հիման վրա։ Դա գիտենք միայն մենք, ձայների առքուվաճառք է եղել»,- մասնավորապես պնդում էին գյուղացիները՝ հավելելով, որ Վայոց Ձորի մարզպետը սատարում է Արթուր Ստեփանյանին։

Մամուլը նաև գրել էր, որ Ստեփանյանը Շատին համայնքի բժշկական կենտրոնի այն ժամանակվա տնօրեն Զոյա Մարտիրոսյանի քրոջ ամուսինն է:  Նա նաեւ Եղեգնաձորի նախկին քաղաքապետ,  Երեւանի քաղաքապետարանի բնապահպանության վարչության նախկին պետ Ավետ Մարտիրոսյանի հովանավորյալն է: 

Գյուլագարակում ՔՊ թեկնածուն մեկ այլ ՀՀԿ-ական է, համայնքի ղեկավարի ԺՊ Խաչիկ Վարդանյանը: Ուշագրավ է, որ Մանուկյանը մեկ անգամ արդեն փորձել է զբաղեցնել համայնքի ղեկավարի պաշտոնը` մրցելով թիմակից Մհեր Գևորգյանի դեմ: Այն ժամանակ Գևորգյանը պնդում էր, որ Մանուկյանը ՀՀԿ-ական չէ, Օրինաց երկրից է, պարզապես տեսնելով, որ ՀՀԿ-ով ավելի շատ շանսեր կան պաշտոն ստանալու՝ բախտը փորձել է այնտեղ: Ինչպես երևում է՝ այժմ էլ եկել է բախտը արդեն ՔՊ-ով փորձելու ժամանակը: