ՀՀ վարչապետ. Պետական բյուջեից փոշիացվել է 200 մլն. դրամ

ՀՀ կառավարության այսօրվա նիստի օրակարգային հարցերին անցնելուց առաջ վարչապետ Տիգրան Սարգսյանը խոսեց նոր բացահայտումների մասին:

«Առաջինը նշեմ, որ մեր  նախորդ խորհրդակցության ժամանակ, որը նվիրված էր առողջապահության ոլորտին, տրվել էին հստակ հանձնարարականներ ինչպես առողջապահության նախարարին, այնպես էլ՝ պետական եկամուտների կոմիտեի նախագահին և մենք վաղը անց ենք կացնելու խորհրդակցություն, որի ընթացքում կփորձենք ամփոփել ուսումնասիրությունների արդյունքները», - նշեց վարչապետը: 

Երկորդը կառավարության ղեկավարը խոսեց շինարարության ոլորտում տեղ գտած թերությունների մասին: «Շինարարության ոլորտում տրվել էին հանձնարարություն վարչապետի վերահսկողության ծառայությանը, քաղաքաշինության նախարարին, ֆինանսների նախարարությանը, որպեսզի ուսումնասիրությունները շարունակվեն պետական բյուջեի արդյունավետ օգտագործման ուղղությամբ և, ցավոք, պետք է նշեմ, որ բացահայտումները շարունակվում են, և շատ խայտառակ պատկեր է մեր առջև բացվում: Անցած շաբաթ ես այցելել էի Շիրակի մարզ և պետական բյուջեից 370 մլն դրամ էր հատկացվել Մեծ Մանթաշ գյուղում դպրոցաշինության վրա, այս պահի դրությամբ նախնական արդյունքներով շուրջ 200 մլն դրամն ուղղակի փոշիացվել է, ավելին, դպրոցը երրորդ աստիճանի վթարային վիճակում է և նշանակում է, որ այդ ծախսերը մենք անիմաստ ենք կատարել: Նմանատիպ իրավիճակ բացահայտվել է Մասիսի հինգերորդ դպրոցում: Ինձ նախարարը զեկուցեց, որ գործերն արդեն հանձնվել են դատախազություն և մենք ուշադիր հետևելու ենք այս գործերին, որպեսզի մեղավորներն անպայման պատժվեն»,-ասաց Տիգրան Սարգսյանը:

Երրորդը, ինչի մասին խոսեց վարչապետը, ֆինանսների նախարարության ներքին աուդիտի ամեն տարվա հաշվետվությունն էր.

«Հաշվետվությունները ներկայացվում են՝ բացահայտումներ, թերություններ, բացթողումներ՝ ըստ ոլորտների, և մինչև այսօր մենք բավարարվել ենք հանձնարարականներով՝ շտկել, վերացնել, վերականգնել գումարները: Այսուհետ այսպես չի լինելու, այսուհետ անձնական պատասխանատվություն են կրելու այն մարդիկ, ովքեր թույլ են տվել այդ խախտումները: Լինելու են պատիժներ, և մեղավոր անձինք կրելու են պատասխանատվություն, մանավանդ որ պետական բյուջեին հասցվում է վնաս»,-նշեց կառավարության ղեկավարը: