Ինչ «սև կատու» է անցել «երդվյալ հեղափոխականների» միջև

Դիցուք, այն որ ՔՊ-ականների միջև սև կատու է անցել պարզ է դառնում հետևյալ օրինակներից։ Շաբաթներ առաջ համացանցը զարմացրել էր առողջապահության փոխնախարար Լենա Նանուշյանի գրառումը, որտեղ նա, ըստ էության, ծաղրում էր իր ղեկավարի՝ Անահիտ Ավանեսյանի հայտնի աղային ռեֆորմը: Նա ֆեյսբուքյան իր էջում զվարճալի տեսանյութ էր հրապարակել, որը TikTok-ից էր, և արել էր տիկտոկեր։ Տեսանյութում տիկտոկերը հանրային սննդի օբյեկտում է, և երբ ձեռքն է վերցնում աղամանը, դիմացը «հայտնվում» է Անահիտ Ավանեսյանը։ Տեսանյութը փոխնախարարը վերնագրել է․ «Աղի իրազեկման միջազգային շաբաթվա ամենադիպուկ վիդեոն»։ Զարմանալի է, որ մի ամբողջ գերատեսչության փոխնախարար տիկտոկյան տեսանյութը ոչ միայն որակում է ամենադիպուկը, այլև այդ կերպ, ըստ էության, միանում է նախարարի՝ հանրային քննարկման ներկայացրած նախագծի վերաբերյալ արված հումորներին։ Իսկ պատճառը դժվար չէ կռահել. մամուլը բազմիցս էր գրել Նունուշյանի` նախարարական ամբիցիաների մասին, որոնք սակայն հեղափոխությունից հետո այդպես էլ չեն բավարարվում։

 

Նույն պատճառով Անահիտ Ավանեսյանի հետ լարված հարաբերությունների մեջ է նախկին նախարար Արսեն Թորոսյանը, ով չի էլ թաքցնում, որ ցանկանում է վերադառնալ գործադիր։ Սորոսական մի շարք ՀԿ-ներ անգամ մեդիա արշավ էին սկսել ընդդեմ Ավանեսյանի, սակայն որևէ արդյունք այն այդպես էլ չտվեց։

 

Շաբաթներ առաջ, երբ ԱԺ-ում քննարկվում էր «Պետական տուրքի մասին» օրենքում փոփոխություններ կատարելու նախագիծը, բավականին կոշտ զրույց ստացվեց պատգամավոր Բաբկեն Թունյանի և Էկոնոմիկայի նախարար Վահան Քերոբյանի միջև: Թունյանը բառացիորեն ասաց հետևյալը՝ «Եթե ԱԺ բերվում է որևէ նախագիծ, պետք չէ մեզ հիշեցնել, թե վարչապետը ինչ է ասել այդ մասին»: Թերևս այսպես նա սթափեցնում էր նախարարին, ով հաճախ է հղում անում վարչապետի այս կամ այն խոսքին: Մամուլը բազմիցս էր գրել, որ Բաբկեն Թունյանը, ով վստահաբար ավելի լավ է հասկանում տնտեսությունից, քան Վահան Քերոբյանը, ցանկանում է զբաղեցնել էկոնոմիկայի նախարարի պաշտոնը և այդ իսկ պատճառով նախարարի գործողությունների քննադատությունը գնալով առավել անթաքույց է դառնում։

 

Բավականին լարված էին Սյունիքի նախկին մարզպետ Մելիքսեթ Պողոսյանի և պատգամավոր Արմեն Խաչատրյանի հարաբերությունները: Գորիսում կայացած վերջին ՏԻՄ ընտրություններում ՔՊ թեկնածուն Վլադիմիր Աբունցն էր: Նա Ագարակի մաքսատան նախկին պետն է եղել, 2019 թվականի մարտի 8-ից սկսած չի աշխատում, ժամանակին բավականին ջերմ հարաբերություններ է ունեցել ՀՀԿ-ականների հետ եւ ՃՈ պետի նախկին տեղակալ Արմեն Խաչատրյանի մտերիմն է, ու վերջինիս շնորհիվ է ՔՊ-ում նրա թեկնածությունը հաստատվել։ Սյունիքի արդեն նախկին մարզպետը ցանկացել է իր տեղակալ Կարո Ավանեսյանին առաջ հրել, սակայն ապարդյուն։ Ներթիմային պայքարին ներգրավվել են նաեւ ընտանիքների անդամները. փոխմարզպետի կինն օրերս Արմեն Խաչատրյանին ու նրա թեկնածուին քննադատող ստատուս էր գրել, ապա ջնջել:

 

Ժամանակին, երբ առողջապահության նախարարի պաշտոնը զբաղեցնում էր Արսեն Թորոսյանը, լարված էին նրա և պատգամավոր Նարեկ Զեյնալյանի հարաբերությունները: Մամուլը այն ժամանակ գրում էր, որ պատգամավորը մեծ ցանկություն ունի զբաղեցնել նախարարի աթոռը:

 

«Քաղաքացիական պայմանագիր» կուսակցության Կապանի եւ Մեղրիի տարածքային կառույցներում՝ հուլիսի 9-ին խորհրդի նախագահների ընտրություններին ընդառաջ լարվել են պատգամավոր Դավիթ Դանիելյանի  և Սյունիքի այլ կարկառուն ՔՊ-ականների հարաբերությունները:

 

Իհարկե, այս ներթիմային լարվածության և գզվրտոցների հիմքում ընկած է ոչ այլ ինչ, քան իշխանության և իշխանական հավելյալ լծակների համար պայքարը, տվյալ դեպքում կուսակցական սոլիդարությունը մղվում է երկրորդ պլան...