Փաշինյանը ա՞չք է փակում իր համայնքապետի՝ «հեղափոխության արժեքներից» շեղվելու վրա

Թալին խոշորացված համայնքում բունտ է հասունանում՝ Փաշինյանի երբեմնի աջակիցները դեմ են նրա ղեկավարած «Քաղաքացիական պայմանագիր» կուսակցության առաջադրած համայնքապետի թեկնածուին՝ Տավրոս Սափեյանին։ Համայնքում երբեմնի հեղափոխական տրամադրություններով տոգորվածները արդեն ոչ թե նախկիններին են մերժում, այլ հենց Փաշինյանի նշանակած ղեկավարներին, պատճառն էլ բավական տրիվիալ է՝ հեղափոխական պաշտոնյաները սկսել են որդեգրել այն բոլոր բացասական բարքերը, որոնք մերժվեցին հասարակության կողմից 2018-ին:

Դիցուք՝ ինչ էր խոստանում Փաշինյանը բոլորին, այդ թվում թալինցիներին: Կրիմինալը և քրեական պատմության մեջ թաթախվածները այլևս պետական կառավարման համակարգում տեղ չեն ունենալու: Հիշեցնենք, որ Տավրոս Սափեյանը բավական աղմկոտ քրեական գործով էր անցնում: 2019 թվականին  Արմավիրի մարզի Քարակերտ գյուղում տեղակայված Թալին ՋՕԸ-ի գրասենյակ են մուտք գործել ՀԱԿ-ի Սափեյան եղբայրներն իրենց որդիներով ու զենքի սպառնալիքով փորձել են իրենց կրտսեր որդուն նշանակել պետի տեղակալ: Ծեծուջարդ է սկսվել, որին հաջորդել են կրակոցներ: Ըստ լուրերի՝ մինչ ոստիկանության ժամանելը, Սափեյանները փախել էին: Կրակել էին ՋՕԸ-ի աշխատակիցներից Սուրենի ուղղությամբ։ Նոյեմբերի 11-ին հայտնի դարձավ, որ տեղի ունեցած դեպքով հարուցվել է քրեական գործը, Սափեյաններից Տավրոսը ներգրավվել է որպես կասկածյալ, նրա նկատմամբ խափանման միջոց է ընտրվել ստորագրություն չհեռանալու մասին։

Փաշինյանը հայտարարում էր, որ որևէ համագործակցություն թալանչի նախկինների հետ չի լինում, մինչդեռ ՏԻՄ ընտրություններից հետո մամուլը բազմիցս գրել էր, որ Սափեյանին ընտրվելու հարցում մեծապես օգնել է նախկին մարզպետ, ՀՀԿ-ական Սարգիս Սահակյանը:

Փաշինյանը պնդում էր, որ նախկինների բարքերը, այն է՝ ամեն գնով, օրենք խախտելով իշխանությունը պահելու ավանդույթը իսպառ վերանալու է: Ինչպես գիտենք, Սափեյանը ընտրվեց համայնքապետ ընդդիմադիր Կարեն Գրիգորյանի տված ձայնի շնորհիվ: Մամուլը գրել էր, որ Գրիգորյանի բարեկամը՝ Ռուստամ Ստեփանյանը, հետախուզման մեջ է Ռուսաստանում։ Մամուլում շրջանառվող տեղեկությունների համաձայն՝ Գրիգորյանը հենց բարեկամի  ճնշումների պատճառով է փոխել որոշումը, քանի որ վերջինիս սպառնացել են արտահանձնել։

Փաշինյանը հայտարարում էր, որ նախկինների՝ պետական համակարգում ներդրված ԽԾԲ ինստիտուտը արմատախիլ է արվելու: Օրերս կայքերից մեկում հայտնվել էր թալինցու հարցազրույցը, որտեղ վերջինս այսպես էր արտահայտվում Սափեյանի մասին: «Ամբողջ Թալինն իրենով է արել, Քարակերտի Ջրային կոմիտեն իրենով է արել, հորեղբոր տղուն՝ Անդրանիկ Սափեյանին, հայտնի միջադեպով՝ կրակոցներով, նշանակեց ջրայինի պետ․․․ Մի խոսքով՝ մենք ամեն ինչ անելու ենք, որպեսզի ինքը չլինի մեր համայնքապետը»։

Փաստորեն, կամ Նիկոլ Փաշինյանն էր ժամանակին հրապարակավ ստում թալինցիներին և վերը նշված բարքերի դեմ չէր էլ պատրաստվում իրական պայքար մղել, կամ նրա նշանակած համայնքապետը, մեղմ ասած, աչք է փակում վարչապետի տված խոստումների և դրանք կատարելու անհրաժեշտության վրա: