Ռոբերտ Ղուկասյանը «չեզոքացնո՞ւմ» է Արսեն Թորոսյանին

Այսօր մամուլը գրեց այն մասին, որ Կապանի բժշկական կենտրոնի տնօրեն Կարեն Մելքոնյանն աշխատանքից ազատվելու դիմում է ներկայացրել: Կարեն Մելքոնյանը,  չնայած տնօրեն է նշանակվել Սյունիքի նախկին մարզպետ, ներկայում՝ Ազգային ժողովի «Հայաստան» խմբակցության պատգամավոր Վահե Հակոբյանի որոշմամբ ,սակայն, մտերիմ հարաբերություններ ունի նաեւ իշխանական թեւի, մասնավորապես «Քաղաքացիական պայմանագիր» խմբակցության պատգամավոր Արսեն Թորոսյանի հետ։

Թորոսյանը վերջին ՏԻՄ ընտրություններին գործուղված էր Սյունիք այստեղ ընտրությունների կուռացիան իրականացնելու նպատակով, այժմ էլ նա զբաղվում է Սյունիքում ՔՊ խորհրդի ընտրություններով և այս համատեքստում նրա մտերիմ համարվող ԲԿ տնօրենի հեռացումը բավական ուշագրավ է: Հարց է նաև, թե արդյոք Մելքոնյանը ինքն է որոշել հեռանալ, թե իմանալով մարզպետի՝ իրեն փոխարինելու մտադրության մասին որոշել է կանխել դա և ինքնակամ լքել պաշտոնը: Ըստ լրատվամիջոցների՝ Սյունիքի մարզպետ Ռոբերտ Ղուկասյանը պատրաստվում է նշանակել կենտրոնի վնասվածքաբանության ծառայության պետ Ասատուր Ասատրյանին։ Վերջինս միաժամանակ Կապան համայնքի ավագանու «Քաղաքացիական պայմանագիր» խմբակցության անդամ է։

Արդյոք մարզպետը ինքն է որոշել, այսպես ասած, չեզոքացնել Արսեն Թորոսյանի ազդեցությունը մարզում, թե այդ ցանկությունը գալիս է ավելի վերևներից: Գաղտնիք չէ, որ վերջին շրջանում Փաշինյանի և Թորոսյանի հարաբերություններում այլևս առկա չէ նախկին ջերմությունն ու վստահությունը, դա է նաև պատճառը, որ Փաշինյանը Թորոսյանին այդպես էլ որևէ կարևոր և բարձր պաշտոն չվստահեց և չի բացառվում, որ մարզպետի միջոցով՝ անգամ ոչ ուղղակի հրամանների, այլ մեսիջների միջոցով նա փորձոմ է զսպել Թորոսյանի ախորժակը: