Հեղափոխական պաշտոնյաները՝ նախկին ու ներկա օլիգարխների PR- մենեջերներ

Հայաստանի պաշտոնյաները հաճախ են հայտարարում այն մասին, որ իրենք կանգնած են շարքային սպառողների կողքին և անխոնջ պայքար են մղում այսպես կոչված օլիգարխների դեմ: Մյուս կողմից էլ այդ պայքարը նրանց չի խանգարում պարբերաբար զբաղվել այդ նույն օլիգարխների անխնա փիառով:

Դիցուք՝ ՔՊ-ական պատգամավոր Վաղարշակ Հակոբյանը օրերս անդրադարձել էր իշխանությունների սրտի նորաթուխ օլիգարխ Նարեկ Նալբանդյանի կողմից կասկածելի գործարքի արդյունքում գնված Գոլդեն Փելըս հյուրանոցին՝ գովերգելով այն նախագիծը, որն այստեղ պատրաստվում է կյանքի կոչվել: Բնական է, որ գովքը վերաբերվում էր ոչ այնքան հյուրանոցի վերակենդանացմանը, որքան Նալբանդյանի, որովհետև հասկանալի չէ, թե պետությունը ինչ է շահելու այն փաստից, որ Հարությունյանի բիզնեսը դզվել է: Վերջինիս հետ, ի դեպ, լուսանկարներ ունի նաև Ռոմանոս Պետրոսյանը և մամուլում հաճախ է գրվել, որը Նալբանդյանը Պետրոսյանի մտերիմն է:

Էկոնոմիկայի նախարար Վահան Քերոբյանը և իր տեղակալները հաճախ են անդրադառնում Սամվել Ալեքսանյանի բիզնեսներին, գովերգում վերջինիս մոլը և տեքստիլ արտադրությունը

ՄՊՀ ղեկավար Գեղամ Գևորգյանը իր հերթին պարծենում է այն հանգամանքով, որ բանանի շուկայում մենաշնորհ այլևս չկա, շուկայում էլ նոր խաղացողներ են հայտնվել: Սակայն, նոր խաղացողը ըստ մամուլում պտտվող լուրերի կապված է Միհրան Պողոսյանի հետ:  Ըստ ՊԵԿ-ի՝ 2018-ին Հայաստան բանան ներկրող 26 տնտեսվարող սուբյեկտներից 13-ը 2018-ին է մուտք գործել բանանի շուկա: Ի դեպ, այդ ընկերությունների մեծ մասն իրավաբանական անձանց պետական ռեգիստրում գրանցվել է 2018-ի մայիսից հետո։ Նոր տնտեսվարողների ցանկում է «Բանանեկ» ընկերությունը, որը պետռեգիստրում գրանցվել է 2018-ի հունիսի 29-ին: Հիմնադիրը «Քեթրին Գրուպ» ընկերության սեփականատեր, գլխավոր տնօրեն Ռիկարդո Անտոնիո Մերինոն է, որը Միհրան Պողոսյանի մտերիմն է համարվում։

Փաշինյանի որոշմամբ էլ 2 միլիոն դոլարի արտոնություն է տրվել նախկին ՀՀԿ-ական պատգամավոր Աշոտ Արսենյանի Ջերմուկ Գրուպին, իսկ նրա որդուն Փաշինյանը ընդհանրապես կարգել է Ջերմուկի համայնքապետ: Ահա այսպիսի անթաքույց փիառ մի անձի, ում ինքը Փաշինյանը ժամանակին համարում էր Սերժ Սարգսյանի աջ ձեռքը:

Ինչպես տեսնում ենք՝ Նոր Հայաստանի պաշտոնյաները որևէ միտք չունեն նախկին և ներկա օլիգարխների բիզնեսները մանրադիտակի տակ առնել, փոխարենը՝ նրանք իրենց լավ են զգում վերջիններիս փիառ մենեջերների դերում...