Արմեն Աշոտյանը փոշիացված միլիոնների մասին (տեսանյութ)

ՀՀ կառավարության այսօրվա նիստի օրակարգային հարցերին անցնելուց առաջ վարչապետ Տիգրան Սարգսյանը խոսեց նոր բացահայտումների մասին: Ուշադրության կենտրոնում էր մասնավորապես Մեծ Մանթաշ գյուղի դպրոցաշինության հարցը, որի համար հատկացված 370 մլն դրամ գումարից շուրջ 200 մլն դրամն ուղղակի փոշիացվել էր։

Նիստի ժամանակ Կառավարությունը հավանություն տվեց Կրթության և գիտության նախարար Արմեն Աշոտյանի կողմից ներկայացված օրենքի նախագծին՝ Երևանի ճարտարագիտական համալսարանում լաբորատորիա ստեղծելու մասին։

Ծրագիրն իրականացնելու համար ՀՀ կառավարության, ԱՄՆ-ի Միջազգային զարգացման գործակալության, հանրահայտ «National Instruments» կորպորացիայի և ՀՀ ճարտարագիտական պետական համալսարանի ջանքերով կիրականցվի 6,2 մլն դոլարի ներդրում:

Արմեն Աշոտյանը, պատասխանելով Lurer.com-ի այն հարցին, թե որքանով է համոզված, որ այդ գումարների մի մասը ևս չի փոշիացվի, ասաց. «Առաջին՝ ծարագիրն իրականցվում է մի փուլում, երբ պետության կողմից վերահսկողությունը շինարարության նկատմամբ կտրուկ խստացվել է. և չեմ կարծում, որ որևէ շինարար հիմա կհանդգնի այդ գումարի փոշիացման ջանքեր կամ փորձեր գործադրել։

Երկրորդ՝ ծրագիրն իրականացվելու է մասնավոր և միջազգային կազմակերպությունների ներգրավմամբ և, բնականաբար, սա նույնպես հստակ ավելացնում է որակյալ աշխատանք ունենալու հավանականությունը։ Լինելու է նաև համապատասխան փորձագիտական վերահսկողություն այս շինարարական աշխատանքների վրա»,-նշեց նախարարը՝ հավելելով, որ գումարի մեծ մասը վերաբերում է սարքավորումներին, լաբորատորիաներին, վերապատրաստումներին, ծրագրերին։ «Գումարի մեծ մասը շինարարություն չէ, գումարի 20 տոկոսն է շինարարություն»,-եզրափակեց Արմեն Աշոտյանը։