ՔՊ-ական համայնքապետերի՝ կոռուպցիոն ռիսկ պարունակող «անկեղծացումները»

Ամիսներ առաջ ՔՊ ցուցակով համայնքապետ ընտրված մի շարք պաշտոնյաների հայտարարագրեր որոշակի հարցեր են առաջացնում և տպավորություն է ստեղծվում, որ վերջիններս այնքան էլ թափանցիկ չեն հանրության առաջ սեփական եկամուտները և դրանց աղբյուրները ներկայացնելու հարցում:

Դիցուք՝ Աշտարակի երկարամյա քաղաքապետ Թովմաս Շահվերդյանը, ով, սակայն, վերջին ՏԻՄ ընտրություներին ստացավ ՔՊ-ի անվերապահ աջակցությունը, կանխիկ դրամ է  հայտարարագրել` 7,000,000.00 ՀՀ դրամ և 9,000.00 ԱՄՆ դոլար: Սա մի դեպքում, երբ աշխատանքից ստացված եկամուտը 3,722,101.00 ՀՀ դրամ է, բանկային հաշվի մնացորդն էլ՝ 8,053,071.00 ՀՀ դրամ: Այս դեպքում այնքան էլ հասկանալի չէ, թե որտեղից վերը նշված 9,000.00 ԱՄՆ դոլարը, այդ գումարի ծագման և աղբյուրների մասին տեղեկություն չկա:

Արարատի համայնքապետ ընտրված Ասլան Ավետիսյանը հայտարարգրել է 38,590,000.00 դրամի չափով բաժնետոմս, սակայն թե որ ընկերությունում 99.33 տոկոսի հասնող բաժնեմասնակցություն ունի Ավետիսյանը՝ հանրությանը չի ներկայացվել:

Սիսիանի համայնքապետ նշանակված Արմեն Հակոբջանյանը 2019 թվականին Երևանի Նոր Նորք վարչական շրջանում որպես նվիրատվություն ստացել է բնակարան: Ընդ որում, հայտարարատուի և համասեփականատիրոջ միջև կապի բնույթը պաշտպանված է, հետևաբար որևէ կերպ դա պարզելը դառնում է անհնար:

Դիլիջանի համայնքապետ Դավիթ Սարգսյանը իր հայտարարագրի համաձայն 2021 թվականին 10 միլիոն դրամով անշարժ գույք է վաճառել

Սակայն եկամուտներ բաժնում՝ գույքը (բացառությամբ դրամական միջոցների) օտարելուց ստացված եկամուտը 2,500,000.00 ՀՀ դրամ: 

Ջերմուկի համայնքապետ ընտրված Վահագն Արսենյանը՝ ՀՀԿ-ական նախկին պատգամավոր Աշոտ Արսենյանի որդին ընդհանրապես գործարար է և շահույթ է ստանում ընտանեկան բիզնեսից: 

Այստեղից իհարկե մի շարք հարցեր են առաջանում, արդյոք Արսենյանը չի կարող իր պաշտոնական դիրքը օգտագործել ի շահ իր բիզնեսի: Նման կասկածներ արդեն իսկ կան:Իրավաբանական անձանց էլեկտրոնային ռեգիստրի տվյալների համաձայն՝ «Ջերմուկ գրուպի» միակ բաժնետերը և տնօրենը համայնքի ղեկավարի նորանշանակ ժամանակավոր պաշտոնակատար Վահագն Արսենյանն է։ Շշալցված հանքային ջրերի ապրանքային շուկայում, ըստ Մրցակցության պաշտպանության հանձնաժողովի, «Ջերմուկ գրուպը» ունի գերիշխող դիրք։ 

Ջերմուկում մեկնարկած շինարարական աշխատանքները իրականացնում է հենց Արսենյանի ընտանիքին պատկանող «Ջերմուկ Գրուպ»-ը` իր ֆինանսական միջոցներով։ Դիցուք` Ջերմուկում կկառուցվի նոր բնակելի թաղամաս՝ բաղկացած մոտ 300 բնակարանից։ Ծրագրի նախագիծը արդեն կա, իսկ կառուցապատման աշխատանքների մեկնարկը կտրվի 2022 թվականի մայիս ամսից։ Ծրագիրը իրականացվում է «Ջերմուկ Գրուպ» ընկերության կողմից։

Ինչպես տեսնում ենք՝ ՔՊ-ական նորընտիր համայնքապետերը ոչնչով հետ չեն մնում իրենց թիմակիցներից և վերջիններիս հայտարարագրերը նույնպես բավական լուրջ հարցեր են առաջացնում՝ կապված կոռուպցիոն ռիսկերի հետ...